കൊണ്ടോട്ടി: ഹജ്ജ് വളണ്ടിയര്‍ തിരഞ്ഞെടുപ്പിലെ ആക്ഷേപമുള്‍പ്പെടെ ചര്‍ച്ചചെയ്യാന്‍ സംസ്ഥാന ഹജ്ജ് കമ്മിറ്റി യോഗം നാളെ കരിപ്പൂര്‍ ഹജ്ജ് ഹൗസില്‍ ചേരും.
ഉച്ചക്ക് മൂന്നിന് ചേരുന്ന യോഗത്തില്‍ സംസ്ഥാന ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ് കുഞ്ഞിമൗലവി അധ്യക്ഷനാകും. ഈവര്‍ഷത്തെ ഹജ്ജ് വളണ്ടിയര്‍ നിയമനത്തിനെതിരേ ഹജ്ജ് കമ്മിറ്റി അംഗങ്ങളടക്കം രംഗത്തുവന്നിരുന്നു.
വിവാദത്തിനു ശേഷമുള്ള ആദ്യ ഹജ്ജ് കമ്മിറ്റി യോഗമാണ് കരിപ്പൂരില്‍ നടക്കുന്നത്. കരിപ്പൂരില്‍ കഴിഞ്ഞമാസം നടന്ന വളണ്ടിയര്‍ അഭിമുഖത്തില്‍ 53 പേരെയാണ് തെരഞ്ഞെടുത്തത്. ഏഴുപേര്‍ വെയ്റ്റിങ് ലിസ്റ്റിലുമുണ്ട്.