വടക്കാഞ്ചേരി : നഗരഹൃദയത്തില്‍ വടക്കാഞ്ചേരി പുഴയില്‍ പ്ലാസ്റ്റിക് മാലിന്യങ്ങള്‍ നിറയുന്നു. ചണ്ടിയും പായലും പ്ലാസ്റ്റിക് കുപ്പികളും പുഴയില്‍ കുന്നു കൂടി കിടക്കുമ്പോള്‍ ദുര്‍ഗന്ധത്തിന്റെ കേന്ദ്രമാവുകയാണു പുഴ. പുഴ പാലത്തിനു താഴെ നിന്നുള്ള പുഴയുടെ കാഴ്ച ഏറെ വേദനിപ്പിക്കുന്നതാണ്. പ്ലാസ്റ്റിക് ചാക്കുകളില്‍ നിറഞ്ഞു കിടക്കുന്ന മാലിന്യങ്ങളും മദ്യ കുപ്പികളും ഹോട്ടലുകളില്‍ നിന്നു പുഴയിലേക്കു എറിയുന്ന കുപ്പികളുമൊക്കെ പുഴയില്‍ കൂമ്പാരമാകുന്നു. ചണ്ടിയും പായലും മൂലം വെള്ളം പുറത്തേക്കു കാണാന്‍ കഴിയാത്ത അവസ്ഥയാണ്. വെള്ളത്തിനു കളര്‍ മാറ്റം സംഭവിച്ചിരിക്കുന്നു.
പുഴയില്‍ കാട്ടുപൊന്തകള്‍ വളര്‍ന്നു പാലത്തിനു താഴെ ഒരു തുരുത്ത് തന്നെ രൂപപ്പെട്ട സ്ഥിതിയാണ്. പുഴ സംരക്ഷണത്തിനു ബൃഹദ് പദ്ധതി ആവിഷ്‌കരിക്കുമെന്നു അധികൃതര്‍ പ്രഖ്യാപിക്കുമ്പോഴും എല്ലാം പ്രഖ്യാപനങ്ങളില്‍ ഒതുങ്ങുകയാണ്. കുന്നു കൂടി കിടക്കുന്ന ചണ്ടിയും പായലും നീക്കം ചെയ്യുന്നതിനു പോലും അധികൃതര്‍ ഒരു നീക്കവും നടത്തുന്നില്ലെന്ന ആരോപണവും ശക്തമാണ്.