ആലപ്പുഴ: ജില്ലയിലെ വിവിധ ഭാഗങ്ങളില്‍ മാലിന്യ നിക്ഷേപം രൂക്ഷമാകുന്നു. ദേശീയപാത, സ്‌കൂളുകള്‍ എന്നിവയുടെ ഓരങ്ങളില്‍  മാലിന്യ നിക്ഷേപം വ്യാപകമായി. അധികൃതര്‍  കര്‍ശന  സമീപനം സ്വീകരിക്കത്താതാണ് ഇത് വ്യാപകമാവാന്‍ കാരണം. രാത്രികാലങ്ങളില്‍ അറവുശാലാ അവശിഷ്ടങ്ങള്‍ക്കൊപ്പം ജൈവ, അജൈവ മാലിന്യങ്ങളടക്കം നിക്ഷേപിക്കപ്പെടുന്നു. ആലപ്പുഴ ആധുനിക അറവുശാല വളപ്പില്‍ പ്ലാസ്റ്റിക് അജൈവ മാലിന്യങ്ങള്‍ വ്യാപകമായിരിക്കുകയാണ്. ഇടവേളകളില്‍ ഇവിടെ മാലിന്യം കൂട്ടിയിട്ട് കത്തിക്കുന്നത് സമീപവാസികള്‍ക്കും യാത്രക്കാര്‍ക്കും ദുരിതമായിരിക്കുകയാണ്.
നഗരസഭയുടെ വിവിധ കേന്ദ്രങ്ങളില്‍ എയ്‌റോബിക് കംപോസ്റ്റുകളും വീടുകളില്‍ പൈപ്പ് കംപോസ്റ്റുകളും സ്ഥാപിച്ചാണ് നഗരസഭയിലെ മാലിന്യ പ്രശ്‌നത്തിന് പരിഹാരം കണ്ടിരുന്നത്. നിലവില്‍ നഗരസഭയിലെ മാലിന്യങ്ങള്‍ എയ്‌റോബിക് കംപോസ്റ്റുവഴി വളമാക്കി മാറ്റി വില്‍പ്പന നടത്തുന്നു. ഫലത്തില്‍ ഇത് തുടരുന്നുണ്ടെങ്കിലും നഗരസഭാ അധികൃതര്‍ക്ക് നിയന്ത്രിക്കാന്‍ കഴിയാത്തവിധം ഹോട്ടല്‍ ഭക്ഷണ മാലിന്യങ്ങളടക്കം പൊതുസ്ഥലങ്ങളില്‍ നിക്ഷേപിക്കപ്പെടുകയാണ്.
മാലിന്യം നിക്ഷേപിക്കുന്നവരെ പിടികൂടാനായി പല സ്ഥലങ്ങളിലും സ്ഥാപിച്ചിട്ടുള്ള ക്യാമറകള്‍ പ്രവര്‍ത്തനരഹിതമായതും ഇത്തരക്കാര്‍ക്ക് തുണയായി.
  മാരാരിക്കുളം പഞ്ചായത്തിലെ വിവിധ ഭാഗങ്ങളില്‍ രാത്രികാലങ്ങളില്‍ കക്കൂസ് മാലിന്യം തള്ളുന്നതായും പരാതി ഉയരുന്നിട്ടുണ്ട്. പ്രദേശങ്ങളിലെ റോഡുകളിലും വീടുകളുടെ മുന്‍ഭാഗത്തുമാണ് കക്കൂസ് മാലിന്യം ഉള്‍പ്പെടെയുള്ളവ തള്ളുന്നത്. രാത്രികാലങ്ങളില്‍ പ്രദേശത്തെ വഴിവിളക്കുകള്‍ കത്താതെ കിടക്കുന്നതും മാലിന്യം തള്ളുന്നവര്‍ക്ക് അനുഗ്രഹമായി മാറുകയാണ്.
അന്യജില്ലകളില്‍ നിന്നും ജില്ലയുടെ പല പ്രദേശങ്ങളിലും മാലിന്യം നിക്ഷേപിക്കുന്നത് ഏറെ നാളുകളായി തുടരുകയാണ്. ആലപ്പുഴചങ്ങനാശ്ശേരി റോഡിലും അമ്പലപ്പുഴ തിരുവല്ല റോഡിലും അരൂര്‍, ചേര്‍ത്തല മേഖലകളിലും കക്കൂസ് മാലിന്യം തള്ളുന്നത് പതിവാണ്. പുലര്‍ച്ചെ പത്രവിതരണത്തിനും വ്യായാമത്തിനുമായി ഇറങ്ങുന്നവരും മാലിന്യത്തില്‍ തെന്നിവീണ് അപകടങ്ങള്‍ ഉണ്ടാകുന്നത് നിത്യസംഭവമാണ്.
കൂടാതെ സന്ധ്യകഴിഞ്ഞാല്‍ പ്രദേശത്ത് മദ്യ, മയക്കുമരുന്ന് മാഫിയകളുടെ അഴിഞ്ഞാട്ടവും സ്ഥിരമാണ്. അധികൃതര്‍ ഇക്കാര്യത്തില്‍ അടിയന്തിര നടപടി സ്വീകരിച്ച് പൊലിസ് പട്രോളിങ് കര്‍ശനമായി നടത്തണമെന്നും തെരുവ് വിളക്കുകളുടെ കേടുപാടുകള്‍ മാറ്റി ഉപയോഗ യോഗ്യമാക്കണമെന്നും ആവശ്യം ഉയരുന്നു.