മേപ്പയ്യൂര്‍: പ്രകൃതി മൂലധനം സംരക്ഷിക്കുന്ന വികസന നയമാണ് എല്‍.ഡി.എഫ് സര്‍ക്കാരിന്റെതെന്ന് മന്ത്രി വി.എസ് സുനില്‍ കുമാര്‍. ശുദ്ധവായുവും, ശുദ്ധജലവും വിഷ രഹിത ഭക്ഷണവുമാണ് ഹരിത കേരളമിഷനിലൂടെ ലക്ഷ്യം വയ്ക്കുന്നത്. ഇതിനായി മൂന്ന് ലക്ഷം ഹെക്ടര്‍ ഭൂമി കൂടി പുതുതായി കൃഷിയോഗ്യമാക്കും.
രോഗമില്ലാത്ത കേരളത്തെ സൃഷ്ടിക്കാന്‍ കാര്‍ഷിക കേരളത്തിന് സാധിക്കണം. ഇതിനായി കാര്‍ഷിക കര്‍മ സേന കേരളം മുഴുവന്‍ വ്യാപിപ്പിക്കുമെന്നും കൃഷി വകുപ്പ് മന്ത്രി പറഞ്ഞു. കരുവോട് കണ്ടംചിറയില്‍ കതിര്‍ കനവ് -18 ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
രണ്ടു പതിറ്റണ്ടിലേറെയായി തരിശായി കിടന്ന മണ്ണ് അയ്യായിരത്തോളം പേര്‍ അണിനിരന്ന ജനകീയ കൂട്ടായ്മയിലൂടെ കൃഷിയോഗ്യമാക്കിയതിന്റെ തുടര്‍ച്ചയായി സംസ്ഥാന കൃഷിവകുപ്പും മേപ്പയ്യൂര്‍ പഞ്ചായത്തും ചേര്‍ന്ന് സംഘടിപ്പിച്ച കതിര്‍ കനവ് 2018 വിളയാട്ടൂര്‍ ഗ്രാമത്തിന് അവിസ്മരണീയ അനുഭവമായി.
തൊഴില്‍ എക്‌സൈസ് വകുപ്പ് മന്ത്രി ടി.പി.രാമകൃഷ്ണന്‍ അധ്യക്ഷനായി. മികച്ച കര്‍ഷകര്‍ക്കുള്ള ഉപഹാരം മേലടി ബ്ലോക്ക് പഞ്ചായത്ത് പ്രസിഡന്റ് കെ. കുഞ്ഞിരാമന്‍ വിതരണം ചെയ്തു. ജില്ലയിലെ മികച്ച രണ്ടാമത്തെ കൃഷി ഓഫിസറായി തെരഞ്ഞെടുത്ത സ്മിതാ നന്ദിനിയെ ഹരിത കേരളം കോഡിനേറ്റര്‍ ഡോ. ജയകുമാര്‍ പൊന്നാട അണിയിച്ചു. പി.പി രാധാകൃഷ്ണന്‍ റിപ്പോര്‍ട്ട് അവതരിപ്പിച്ചു.
മേപ്പയ്യൂര്‍ പഞ്ചായത്ത് പ്രസിഡന്റ് പി.കെ റീന, ജില്ലാ പഞ്ചായത്തംഗങ്ങളായ സുജാത മനക്കല്‍, എം.പി അജിത, ബ്ലോക്ക് അംഗങ്ങളായ സുനില്‍ ഓടയില്‍, ടി.കെ.ചന്ദ്രബാബു, പഞ്ചായത്ത് അംഗങ്ങളായ യൂസുഫ് കോറോത്ത്, വി.വി.രമ, സറീന ഒളോറ, പി എം പവിത്രന്‍, സി പി ഷെല്‍വി, ഷര്‍മിന കോമത്ത്, എം പി ശോഭ സംസാരിച്ചു.
കര്‍ഷകത്തൊഴിലാളികളും കുടുംബശ്രീ പ്രവര്‍ത്തകരും ചേര്‍ന്ന് മെഗാ തിരുവാതിരയും വി.ഇ.എം.യു.പി സ്‌കൂള്‍ വിദ്യാര്‍ഥികള്‍ പാളേം കയറും എന്ന നാടകവും അവതരിപ്പിച്ചു.