മുക്കം: പന്നിക്കോട് എ.യു.പി സ്‌കൂളിന് അത്യാധുനിക സൗകര്യങ്ങളോട് കൂടിയ പുതിയ ബഹുനില കെട്ടിടം നിര്‍മിച്ച് ഒരു വര്‍ഷം പൂര്‍ത്തിയായെങ്കിലും പഴയകെട്ടിടം പൊളിച്ചുമാറ്റാന്‍ വിദ്യാഭ്യാസ വകുപ്പധികൃതര്‍ അനുവാദം നല്‍കാത്തതിനെ തുടര്‍ന്ന് നിര്‍മാണം നിലച്ച സ്‌കൂളിലെ ഹൈടെക് സ്റ്റേജിന്റെ നിര്‍മാണ പ്രവൃത്തിക്ക് തുടക്കമായി.
കഴിഞ്ഞദിവസം താമരശേരി വിദ്യാഭ്യാസ ജില്ല ഓഫിസില്‍നിന്ന് പഴയ കെട്ടിടം പൊളിച്ചുമാറ്റാനുള്ള ഉത്തരവ് ലഭിക്കുകയായിരുന്നു. അടുത്ത അധ്യയന വര്‍ഷത്തിന് മുന്‍പ് കെട്ടിടം പൊളിച്ചുമാറ്റിയില്ലങ്കില്‍ അത് വിദ്യാര്‍ഥികള്‍ക്ക് വലിയ ഭീഷണിയാകുമായിരുന്നു. ഈ സാഹചര്യത്തില്‍ പൂര്‍വവിദ്യാര്‍ഥി സംഘടനയുടെ നേതൃത്വത്തില്‍ പ്രക്ഷോഭത്തിന് തയാറെടുക്കുന്നതിനിടെയാണ് കഴിഞ്ഞ ദിവസം പഴയ കെട്ടിടം പൊളിക്കാന്‍ അനുമതി ലഭിച്ചത്.
പഴയ കെട്ടിടം പൊളിച്ചുമാറ്റാന്‍ തുടങ്ങിയതോടെ സ്‌കൂളില്‍ പൂര്‍വവിദ്യാര്‍ഥികള്‍ക്കായി ഏബ്ള്‍ ഇന്റര്‍നാഷണല്‍ ഗ്രൂപ്പ് ചെയര്‍മാന്‍ സിദ്ദീഖ് പുറായില്‍ നിര്‍മിച്ചുനല്‍കുന്ന ഹൈടെക് സ്റ്റേജിന്റെ നിര്‍മാണ പ്രവര്‍ത്തനങ്ങള്‍ക്കും തുടക്കമായി. ആറു ലക്ഷം രൂപ ചെലവിലാണ് അത്യാധുനിക സൗകര്യങ്ങളോടു കൂടിയ സ്റ്റേജ് നിര്‍മിക്കുനത്. സ്റ്റേജിന്റെ കുറ്റിയടിക്കല്‍ കര്‍മം സ്‌കൂള്‍ മാനേജര്‍ സി. കേശവന്‍ നമ്പൂതിരി നിര്‍വഹിച്ചു. പൂര്‍വവിദ്യാര്‍ഥി സംഘടന പ്രസിഡന്റ് ടി.കെ ജാഫര്‍ അധ്യക്ഷനായി. മുക്കം പ്രസ് ഫോറം സെക്രട്ടറി സി. ഫസല്‍ ബാബു, ഉണ്ണി കൊട്ടാരത്തില്‍, രമേശ് പണിക്കര്‍, സി. ഹരീഷ്, ഏബ്ള്‍ ഗ്രൂപ്പ് മാനേജര്‍ അഷ്‌റഫ് കണിയാത്ത്, മജീദ് പുളിക്കല്‍, ബഷീര്‍ പാലാട്ട്, മജീദ് കുവപ്പാറ, ബാബു മൂലയില്‍, യൂനുസ് എരഞ്ഞിമാവ് സംസാരിച്ചു.