ചവറ: കൊട്ടുകാട് മുകുന്ദപുരത്ത് നായകള്‍ കൂട്ടത്തോടെ റോഡരുകിലും വെള്ളത്തിലും ചത്ത നിലയില്‍ കണ്ടെത്തി. കൊട്ടുകാട് കോയിവിള റോഡില്‍  മുകുന്ദപുരം പാലത്തിന് സമീപമാണ് 8 നായകള്‍ ചോര തുപ്പി ചത്ത നിലയില്‍ കണ്ടത്. പ്രദേശത്തെ കച്ചവട സ്ഥാപനങ്ങളിലുള്ളവരാണ് സമീപ പുരയിടത്തിലും പാലത്തിന് താഴെ വെള്ളത്തിലുമായി നായകള്‍ ചത്ത് കിടന്നത് ആദ്യം കണ്ടത്. . തുടര്‍ന്ന് നടത്തിയ പരിശോധനയില്‍ കൂടുതല്‍ നായകളെ കണ്ടെത്തുകയായിരുന്നു. കൂട്ടത്തോടെ നായകള്‍ ചാകാനുള്ള കാരണം വ്യക്തമല്ല.
ഈയടുത്ത കാലത്തായി പാലത്തിനിരുവശവും മാലിന്യ നിക്ഷേപം വ്യാപകമായതിനാല്‍ തെരുവ് നായകളുടെ ശല്യം രൂക്ഷമായിരുന്നു. സംഭവമറിഞ്ഞ് പഞ്ചായത്ത് പ്രസിഡന്റ് പി.കെ. ലളിത സ്ഥലത്ത് എത്തി. തുടര്‍ന്ന് ചത്ത നായകളെ സമീപ പുരയിടത്തില്‍ കുഴിച്ചുമൂടി.