നിര്‍ധന കുടുംബത്തിന് സൗജന്യ വൈദ്യുതിയുമായി എസ്.വൈ.എസ് കോടാലി യൂനിറ്റ്
കോടാലി: അസഹിഷ്ണുതയും അരാജകത്വവും കൊടികുത്തി വാഴുമ്പോള്‍ മത സൗഹാര്‍ദത്തിന്റെ പുതിയ അധ്യായം രചിച്ച്് എസ്.വൈ.എസ്. കോടാലി ജുമുഅ മസ്ജിദ് പരിസരത്ത് താമസിക്കുന്ന നിര്‍ധന കുടുംബത്തിലെ അയ്യപ്പന് സൗജന്യമായി വൈദ്യുതി കണക്ഷന്‍ എടുത്തുനല്‍കിയാണ് എസ്.വൈ.എസ് കോടാലി യൂനിറ്റ് പ്രവര്‍ത്തകര്‍ മാതൃകയായത്.
സംസാര ശേഷിയില്ലാത്ത 68കാരനായ അയ്യപ്പന്റെ വീട്  വൈദ്യുതീകരിക്കുന്നതിനാവശ്യമായ വയറിങ് നടത്തി കൊടുത്തതും എസ്.വൈ.എസിന്റെ പ്രവര്‍ത്തകരാണ്. പ്രവര്‍ത്തകര്‍ പരസ്പരം സഹകരിച്ചാണ് ഇതിന് ആവശ്യമായ ഫണ്ട് സ്വരൂപിച്ചത്. അയ്യപ്പനും കുടുംബവും തങ്ങളുടെ വീട്ടില്‍ വൈദ്യുതി ലഭിക്കുന്നതിന് വേണ്ടിയുള്ള കാത്തിരിപ്പ് തുടങ്ങിയിട്ട് വര്‍ഷങ്ങളായി. ഒരു നിര്‍ധന കുടുംബത്തിന്റെ കാലങ്ങളായിട്ടുള്ള സ്വപ്നം പൂര്‍ത്തീകരിച്ചു കൊടുക്കാന്‍ കഴിഞ്ഞതിലുള്ള സന്തോഷത്തിലാണ് എസ്.വൈ.എസിന്റെ പ്രവര്‍ത്തകര്‍.
ഇന്നലെ രാവിലെ നടന്ന ചടങ്ങില്‍ എസ്.കെ.എസ്.എസ്.എഫ് ജില്ലാ ജനറല്‍ സെക്രട്ടറി ഷെഹീര്‍ ദേശമംഗലം വൈദ്യുതി കണക്ഷന്റെ സ്വിച്ച് ഓണ്‍ കര്‍മം നിര്‍വഹിച്ചു. കോടാലി മഹല്ല് ഖത്തീബ് അബൂബക്കര്‍ ഫൈസി പ്രാര്‍ഥന നിര്‍വഹിച്ചു.
എസ്.വൈ.എസ് കോടാലി യൂനിറ്റ് പ്രസിഡന്റ്് സലാം തെരുവില്‍ അധ്യക്ഷനായി. കെ.പി.എം.എസ് ജില്ലാ കമ്മിറ്റിയംഗം പി.സി വേലായുധന്‍, കോടാലി ഗ്രാമീണ വായനശാല പ്രസിഡന്റ് വി.കെ കാസിം, ഷിഹാബ് തോരപ്പ, അബ്ദുസ്സലാം റഹ്മാനി, ഷാഫി മൗലവി, സലീം മൗലവി, അബ്ദുല്ല മൗലവി, അല്‍ സലാമ ട്രസ്റ്റ് ചെയര്‍മാന്‍ മൊയ്തീന്‍ മാഞ്ഞാമ്പിള്ളി, സുധീര്‍ പോത്താഞ്ചേരി സംസാരിച്ചു.