കണ്ണൂര്‍: കെ.സുധാകരനെതിരേ രൂക്ഷ വിമര്‍ശനവുമായി കെ.പി.സി.സി ജനറല്‍ സെക്രട്ടറി പി. രാമകൃഷ്ണന്‍ രംഗത്ത്. ചപ്പാരപ്പടവില്‍ നടന്ന കോണ്‍ഗ്രസ് നേതൃത്വ പരിശീലന ക്യാംപിന്റെ സമാപന സമ്മേളനം ഉദ്ഘാടനം ചെയ്ത് സംസാരിക്കവേയാണ് സുധാകരനെതിരേ രാമകൃഷ്ണന്‍ ആഞ്ഞടിച്ചത്.
ഊരിപ്പിടിച്ച വാളും ഗുണ്ടകളെയും ഉപയോഗിച്ച് ആളുകളെ അടിച്ചുനിരത്തിയിട്ടുണ്ടെന്ന് വീമ്പ് പറയുന്നതല്ല കോണ്‍ഗ്രസ് നേതാവാകാനുള്ള യോഗ്യത. വാട്‌സ് ആപ്പും ഫേസ്ബുക്കുമാണ് കെ.പി.സി.സി പ്രസിഡന്റിനെ തെരഞ്ഞെടുക്കുന്നതെന്നാണ് ചില വിഡ്ഢികള്‍ ധരിച്ചുവച്ചിരിക്കുന്നത്. ജനങ്ങളോടൊപ്പം നിന്ന് പ്രവര്‍ത്തിച്ച് നിര്‍ഭയരായി രാഷ്ട്രീയപ്രവര്‍ത്തനം നടത്തുന്ന നേതാക്കളാണ് കെ.പി.സി.സി പ്രസിഡന്റ് സ്ഥാനത്തേക്ക് വരേണ്ടതെന്നും അദ്ദേഹം കൂട്ടിച്ചേര്‍ത്തു.