ന്യൂഡല്‍ഹി: കരുത്തരായ കര്‍ണാടകയെ വീഴ്ത്തി ബറോഡയും ഗുജറാത്തിനെ പരാജയപ്പെടുത്തി തമിഴ്‌നാടും വിജയ് ഹസാര ട്രോഫി ഏകദിന പോരാട്ടത്തിന്റെ സെമിയിലേക്കു മുന്നേറി.
ഇര്‍ഫാന്‍ പത്താന്‍ നയിക്കുന്ന ബറോഡ ടീം കര്‍ണാടകയെ ഏഴു വിക്കറ്റിനു തകര്‍ത്താണു അവസാന നാലിലേക്ക് കടന്നത്. ആദ്യം ബാറ്റു ചെയ്ത കര്‍ണാടക 48.5 ഓവറില്‍ 233 റണ്‍സില്‍ പുറത്തായപ്പോള്‍ ബറോഡ 45.5 ഓവറില്‍ മൂന്നു വിക്കറ്റ് നഷ്ടത്തില്‍ 234 റണ്‍സെടുത്തു വിജയിക്കുകയായിരുന്നു.
ക്രുനല്‍ പാണ്ഡ്യയുടെ ഓള്‍റൗണ്ട് മികവാണു ബറോഡയുടെ വിജയം എളുപ്പമാക്കിയത്. ബാറ്റിങില്‍ 70 റണ്‍സെടുത്ത പാണ്ഡ്യ ബൗള്‍ ചെയ്തപ്പോള്‍ മൂന്നു വിക്കറ്റുകളും വീഴ്ത്തി. കേദാര്‍ ദേവ്ധറാണു (78) ബറോഡയുടെ ടോപ് സ്‌കോറര്‍. ദീപക്ക് ഹൂഡ 33ഉം യൂസുഫ് പത്താന്‍ 11ഉം റണ്‍സെടുത്തു പുറത്താകാതെ നിന്നു. അര്‍ധ സെഞ്ച്വറി നേടിയ പവന്‍ ദേശ്പാണ്ഡേയാണ് (54) കര്‍ണാടകയുടെ ടോപ് സ്‌കോറര്‍.
ഗുജറാത്തിനെ തമിഴ്‌നാട് അഞ്ചു വിക്കറ്റിനാണു കീഴടക്കിയത്. ആദ്യം ബാറ്റു ചെയ്ത ഗുജറാത്ത് 49.4 ഓവറില്‍ 211 റണ്‍സില്‍ പുറത്തായപ്പോള്‍ വിജയം തേടിയിറങ്ങിയ തമിഴ്‌നാട് 42.2 ഓവറില്‍ 217 റണ്‍സെടുത്ത് വിജയം സ്വന്തമാക്കി. തമിഴ്‌നാടിനായി ശ്രീധര്‍ രാജ് 85 റണ്‍സെടുത്തു. നേരത്തെ ഗുജറാത്തിനായി റുജുല്‍ ഭട്ട് 83 റണ്‍സെടുത്ത് ടോപ് സ്‌കോററായി.