കല്‍പ്പറ്റ: ആജീവിക ഏവം കൗശല്‍ വികാസ് ദിനത്തിന്റെ ഭാഗമായി കുടുംബശ്രീ ജില്ലാ മിഷന്റെ ആഭിമുഖ്യത്തില്‍ വാക്കത്തോണ്‍ സംഘടിപ്പിച്ചു.
കേന്ദ്ര സര്‍ക്കാര്‍ കുടംബശ്രീ മുഖേന നടപ്പാക്കുന്ന ദീന്‍ ദയാല്‍ ഉപാധ്യായ ഗ്രാമീണ്‍ കൗശല്യ യോജന (ഡി.ഡി.യു.ജി.കെ.വൈ) പദ്ധതി സംബന്ധിച്ച് തൊഴിലന്വേഷകര്‍ക്കിടയില്‍ ബോധവല്‍കരണം നടത്തുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്. ഡി.ഡി.യു.ജി.കെ.വൈ പദ്ധതിക്ക് കീഴില്‍ ജില്ലയില്‍ 1850 പേര്‍ക്ക് പരിശീലനം നല്‍കിയിട്ടുണ്ട്. ആധുനിക കാലഘട്ടത്തിന് അനുയോജ്യമായ, തൊഴില്‍ സാഹചര്യമുള്ള കോഴ്‌സുകളിലാണ് ഡി.ഡി.യു ജി.കെ.വൈ പദ്ധതി പ്രകാരം പരിശീലനം നല്‍കുന്നതെന്നും യൂണിഫോം, പഠനോപകരണങ്ങള്‍ എന്നിവ പൂര്‍ണമായും സൗജന്യമായാണ് നല്‍കുന്നതെന്നും കുടുംബശ്രീ ജില്ലാ മിഷന്‍ കോഡിനേറ്റര്‍ പി സാജിത അറിയിച്ചു.
അണ്ടര്‍ 23 കേരള ക്രിക്കറ്റ് ടീം ക്യാപ്റ്റര്‍ സജ്‌ന സജീവന്‍ വാക്കത്തോണ്‍ ഫ്‌ളാഗ് ഓഫ് ചെയ്തു. ചടങ്ങില്‍ ജില്ലാ മിഷന്‍ അസിസ്റ്റന്റ് കോഡിനേറ്റര്‍മാരായ കെ.ടി മുരളി, കെ.പി ജയചന്ദ്രന്‍, കല്‍പ്പറ്റ മുനിസിപ്പല്‍ സി.ഡി.എസ് ചെയര്‍പേഴ്‌സണ്‍ സഫിയ സംസാരിച്ചു. ക്വൊസ് കോര്‍പ്പ് ട്രെയിനിങ് സെന്റര്‍ മേധാവി രാജീവ് അഗസ്റ്റിന്‍, വിവിധ സെന്ററുകളിലെ വിദ്യാര്‍ഥികള്‍, രക്ഷിതാക്കള്‍, അധ്യാപകര്‍, കുടുംബശ്രീ പ്രവര്‍ത്തകര്‍ പങ്കെടുത്തു.