തലശ്ശേരി: ധര്‍മടം സീഗള്‍സ് ക്രിക്കറ്റ് ക്ലബും ടെലിച്ചറി ടൗണ്‍ ക്രിക്കറ്റ് ക്ലബും സംയുക്തമായി നടത്തിയ ബാബു അച്ചാരത്ത് മെമ്മോറിയല്‍ രണ്ടാമത് പിങ്ക് ബോള്‍ ഓള്‍ കേരള 2020 ക്രിക്കറ്റ് ടൂര്‍ണമെന്റില്‍ തലശ്ശേരി ബി.കെ 55 ക്രിക്കറ്റ് ക്ലബ് ജേതാക്കള്‍.
ഫൈനലില്‍ ധര്‍മടം സീഗള്‍സ് ക്രിക്കറ്റ് ക്ലബിനെ നാലു വിക്കറ്റിനാണ് പരാജയപ്പെടുത്തിയത്. ടോസ് നേടി ആദ്യം ബാറ്റ് ചെയ്ത ധര്‍മടം സീഗള്‍സ് ക്രിക്കറ്റ് ക്ലബ് 18.2 ഓവറില്‍ 85 റണ്‍സിന് എല്ലാവരും പുറത്തായി. മറുപടിയായി ബി.കെ.55 ക്രിക്കറ്റ് ക്ലബ് 18.1 ഓവറില്‍ 4 വിക്കറ്റ് നഷ്ടത്തില്‍ വിജയ ലക്ഷ്യം നേടി.മൂന്ന് വിക്കറ്റ് വീഴ്ത്തിയ ബി.കെ.55 ക്രിക്കറ്റ് ക്ലബ് താരം ഡിജുദാസ് കളിയിലെ കേമനായി. ടൂര്‍ണമെന്റിലെ മികച്ച താരമായി ബി.കെ.55 ക്രിക്കറ്റ് ക്ലബിന്റെ എ.കെ രാഹുല്‍ ദാസിനേയും മികച്ച ബാറ്റ്‌സ്മാനായി തലശ്ശേരി ലെജന്‍ഡ്‌സ് ക്രിക്കറ്റ് ക്ലബ് താരം വി. അഫ്‌നാസിനേയും മികച്ച ബൗളറായി ബി.കെ 55 ക്രിക്കറ്റ് ക്ലബിന്റെ ഡിജുദാസിനേയും മികച്ച യുവതാരമായി ഒമര്‍ അബൂബക്കറിനേയും തെരഞ്ഞെടുത്തു.
അണ്ടര്‍ 23 വുമണ്‍ ഓള്‍ ഇന്ത്യ 2020 ജേതാക്കളായ കേരള താരങ്ങളായ അക്ഷയ എ, പി. സൗരഭ്യ, എന്‍.കെ ദൃഷ്ണ, ഓള്‍ ഇന്ത്യ ബധിര മൂക ടൂര്‍ണമെന്റില്‍ ജേതാക്കളായ കേരള ടീമിലെ മുജീബ്, മന്‍സൂര്‍, കേരള രഞ്ജി ടീം അസിസ്റ്റന്റ് കോച്ച് മസര്‍ മൊയ്തു ഒ.വി, അണ്ടര്‍ 16 കേരള ടീം ട്രെയിനര്‍ എ.കെ രാഹുല്‍ദാസ്, ടൂര്‍ണമെന്റ് കണ്‍വീനര്‍മാരായ സന്തോഷ് പച്ച, സര്‍ഫറാസ് എന്നിവരെ സമാപനചടങ്ങില്‍ ആദരിച്ചു. കേരള ക്രിക്കറ്റ് അസോസിയേഷന്‍ സിക്രട്ടറി ജയേഷ് ജോര്‍ജ് സമ്മാനദാനം നടത്തി.
ചടങ്ങില്‍ കെ.പി സുരേഷ് ബാബു, വി.പി അനസ്, വി.ബി ഇസ്ഹാഖ്, ബിനീഷ് കോടിയേരി, എ.സി.എം ഫിജാസ് അഹമ്മദ്, പി. സതീശന്‍, എ. അഭിമന്യു, ബാബുരാജ്. പി.ടി കൃഷ്ണ രാജു, എ.കെ സന്തോഷ്, സാദിഖ് സംസാരിച്ചു