കൊല്ലങ്കോട്: ഇടുക്കുപാറയിലും ചപ്പക്കാടും കാട്ടാനകളുടെ വിളയാട്ടം. നാട്ടുകാര്‍ സമരത്തിലേക്ക്. ഇടുക്കുപ്പാറയില്‍ വീടുകളും കൃഷിസ്ഥലങ്ങളും നശിപ്പിച്ച് ഭീതി പരത്തിയ ആറംഗ കാട്ടാനക്കൂട്ടമാണ് ചപ്പക്കാട് അടിവാരത്ത് കാട്ടാനകള്‍ വീണ്ടും നാശം വിതച്ചു കൊണ്ടിരിക്കുന്നത്.
അടിവാരത്ത് ശനിയാഴ്ച്ച രാത്രിഇറങ്ങിയ കാട്ടാനകള്‍ കുട്ടന്റെ ഉടമസ്ഥതയിലുള്ള 75 വാഴ, പത്ത് തെങ്ങ്, പമ്പ് സെറ്റ്, പി.വി.സി പൈപ്പുകള്‍ എന്നിവയാണ് നശിച്ചത്. തൊട്ടടുത്ത കര്‍ഷകനായ മുത്തു രാവുത്തറുടെ 40 വാഴ, 30 മാവ് എന്നിവ നശിച്ചു. കമാലുദീന്റെ പറമ്പിലെ കാവല്‍ഷെഡ് എന്നിവ നശിച്ചു.
ഫോറസ്റ്റ് ഉദ്യോഗസ്ഥര്‍ സ്ഥലം സന്ദര്‍ശിച്ചെങ്കിലും കാട്ടാനകള്‍ ജനവാസ മേഖലയില്‍ തന്നെ തമ്പടിച്ചിരിക്കുകയാണ്.
പകല്‍ വനത്തിലെ പാറക്കെട്ടുകളില്‍ മറത്തിരിക്കുന്ന കാട്ടാനക്കൂട്ടം ഇരുട്ടിയാല്‍ താഴെ ഇറങ്ങി കൃഷിനാശം വിതക്കുന്നതായി ചപ്പക്കാട് അടിവാരം വാസികള്‍ പറയുന്നു.
മുത്തുറാവുത്തരുടെ വീടിന് സമീപമെത്തിയ ആനക്കൂട്ടത്തെ കണ്ട് വീട്ടുകാര്‍ ഓടിരക്ഷപ്പെടുകയായിരുന്നു.
ഈ മാസം എട്ടിന് എം.എല്‍.എയുടെ നേതൃത്വത്തില്‍ യോഗം ചേരുമെന്ന് വാര്‍ഡ് മെമ്പര്‍ കൃഷ്ണകുമാര്‍ അറിയിച്ചു.