മഡ്ഗാവ്: 71മത് സന്തോഷ് ട്രോഫി പോരാട്ടത്തിന്റെ പൂള്‍ ബിയിലെ ആദ്യ മത്സരങ്ങളില്‍ മിസോറമിനും പഞ്ചാബിനും വിജയം. മിസോറം 3-1നു മഹാരാഷ്ട്രയേയും പഞ്ചാബ് 2-1നു റെയില്‍വേസിനേയും പരാജയപ്പെടുത്തി.
കഴിഞ്ഞ തവണത്തെ രണ്ടാം സ്ഥാനക്കാരായ മഹാരാഷ്ട്രക്കെതിരേ 2013ലെ ചാംപ്യന്‍മാരായ മിസോറം മികച്ച വിജയമാണു സ്വന്തമാക്കിയത്. എട്ടാം മിനുട്ടില്‍ വാഞ്ച്‌വാങിലൂടെ മിസോറം ലീഡെടുത്തെങ്കിലും 12ാം മിനുട്ടില്‍ രാഹുല്‍ ദാസ് മഹാരാഷ്ട്രയെ ഒപ്പമെത്തിച്ചു.
എന്നാല്‍ ആദ്യ പകുതി തീരാന്‍ ഒരു മിനുട്ടു മാത്രമുള്ളപ്പോള്‍ ഫക്‌സുല മിസോറമിനെ വീണ്ടും മുന്നില്‍ കടത്തി. രണ്ടാം പകുതി തുടങ്ങി 55ാം മിനുട്ടില്‍ ലാല്‍റിന്‍പ്യുയ മിസോറമിന്റെ വിജയ ഗോള്‍ നേടി. രജ്ബിര്‍ സിങ് ഇരു പകുതികളിലായി നേടിയ ഗോളിലാണു പഞ്ചാബ് റെയില്‍വേസിനെ പരാജയപ്പെടുത്തിയത്.
കളിയുടെ 16, 61 മിനുട്ടുകളിലാണു രജ്ബിര്‍ വല ചലിപ്പിച്ചത്. 16 മിനുട്ടില്‍ ലീഡെടുത്ത പഞ്ചാബിനെ 59ാം മിനുട്ടില്‍ രാജേഷ് സൂസനായകം നേടിയ ഗോളില്‍ ഒപ്പം പിടിക്കാന്‍ റെയില്‍വേസിനു സാധിച്ചെങ്കിലും ആഹ്ലാദത്തിനു രണ്ടു മിനുട്ടിന്റെ മാത്രം ആയുസേ ഉണ്ടായിരുന്നുള്ളു.
ഇന്നു നടക്കുന്ന പൂള്‍ എയിലെ രണ്ടാം മത്സരത്തില്‍ നിലവിലെ ചാംപ്യന്‍മാരായ സര്‍വിസസ് ആദ്യ പോരാട്ടം വിജയിച്ച മുന്‍ ചാംപ്യന്‍മാരായ പശ്ചിമ ബംഗാളുമായി ഏറ്റുമുട്ടും.
രണ്ടാം മത്സരത്തില്‍ ചണ്ഡീഗഢ്- മേഘാലയയുമായി ഏറ്റുമുട്ടും. ആദ്യ കളിയില്‍ പരാജയപ്പെട്ട ഇരു ടീമുകള്‍ക്കും ഇന്നു വിജയം അനിവാര്യമാണ്.