തലശ്ശേരി: മര്‍ദനമേറ്റ് തമിഴ്‌നാട് സ്വദേശികളായ മൂന്നു പേരെ പരുക്കുകളോടെ തലശ്ശേരി ജനറല്‍ ആശുപത്രിയില്‍ പ്രവേശിപ്പിച്ചു.
കഴിഞ്ഞ ദിവസം പാലക്കൂല്‍ അവിയാട് ലക്ഷം വീട് കോളനിക്കു സമീപമാണ് സംഭവം. കോളനിയിലെ ജയചന്ദ്രന്‍ (23), മാതാവ് തുളസി (48), സഹോദരി രാജേശ്വരി (25) എന്നിവര്‍ക്കാണ് മര്‍ദനമേറ്റത്. ജോലി കഴിഞ്ഞ് ജയചന്ദ്രന്‍ വീട്ടിലേക്കു വരുമ്പോള്‍ ഈ വഴി കടന്നുപോകാന്‍ പാടില്ലെന്നു പറഞ്ഞ് പാലക്കൂലിലെ ജിഗീഷാണ് മര്‍ദിച്ചതെന്ന് ഇവര്‍ ആരോപിച്ചു. വീട്ടിലെത്തിയ ജയചന്ദ്രന്‍ അമ്മയെ വിവരമറിയിച്ചതിനെ തുടര്‍ന്ന് ചോദ്യം ചെയ്തപ്പോള്‍ ഇവരെയും മര്‍ദിക്കുകയായിരുന്നു. പരാതിയെ തുടര്‍ന്ന് പാനൂര്‍ പൊലിസ് കേസെടുത്തു. ഇവരെ ജാതിപ്പേര് വിളിച്ച് അപമാനിച്ചെന്നും പരാതിയുണ്ട്.