കൊല്ലം: പ്ലസ്ടുവിന് ജില്ലയില്‍ 83.95 ശതമാനം വിജയം. കഴിഞ്ഞ വര്‍ഷത്തെ അപേക്ഷിച്ച് വിജയശതമാനത്തില്‍ കുറവുണ്ട്. കഴിഞ്ഞ കൊല്ലം 84.06 ആയിരുന്നു ജില്ലയിലെ വിജയശതമാനം. ഇത്തവണ ജില്ലയിലെ 136 സ്‌കൂളുകളുകളില്‍ നിന്ന് 27391 വിദ്യാര്‍ഥികളാണ് പരീക്ഷ എഴുതിയത്.
ഇതില്‍ 22995 വിദ്യാര്‍ഥികള്‍ ഉപരിപഠനത്തിന് അര്‍ഹത നേടി. 1381 വിദ്യാര്‍ഥികള്‍ക്ക് എല്ലാ വിഷയത്തിനും എ പ്ലസ് ലഭിച്ചു. ഓപണ്‍ സ്‌കൂള്‍ വിഭാഗത്തില്‍ 2250 വിദ്യാര്‍ഥികള്‍ പരീക്ഷ എഴുതിയതില്‍ 845 പേര്‍ മാത്രമാണ് ഉപരിപഠനത്തിന് അര്‍ഹത നേടിയത്. 37.56 ശതമാനമാണ് വിജയം. ഓപണ്‍ സ്‌കൂള്‍ വിഭാഗത്തില്‍ ആര്‍ക്കും എല്ലാ വിഷയത്തിനും എ പ്ലസ് ഇല്ല.
വൊക്കേഷനല്‍ ഹയര്‍സെക്കന്‍ഡറി വിഭാഗത്തില്‍ 4221 വിദ്യാര്‍ഥികളാണ് ജില്ലയില്‍ പരീക്ഷ എഴുതിയത്. ഇതില്‍ പാര്‍ട്ട് ഒന്ന്, രണ്ട് വിഭാഗത്തില്‍ 3754 വിദ്യാര്‍ഥികള്‍ ഉപരിപഠനത്തിന് അര്‍ഹത നേടി. 88.94 ആണ് വിജയ ശതമാനം.
കഴിഞ്ഞ വര്‍ഷം ഇത് 80.91 ശതമാനമായിരുന്നു. പാര്‍ട്ട് ഒന്ന്, രണ്ട്, മൂന്ന് വിഭാഗത്തില്‍ 3463 വിദ്യാര്‍ഥികള്‍ ഉപരിപഠനത്തിന് അര്‍ഹത നേടി. 82.04 ശതമാനമാണ് വിജയം. 76.67 ആണ് കഴിഞ്ഞ വര്‍ഷത്തെ വിജയശതമാനം. ജില്ലയില്‍ നാലു സ്‌കൂളുകള്‍ നൂറുമേനി വിജയം കരസ്ഥമാക്കി.
കടയ്ക്കല്‍ ഗവ.വി.എച്ച്.എസ്.എസ്, കരുനാഗപ്പള്ളി ഗവ.വി.എച്ച്.എസ്.എസ്, ഇരവിപുരം ഗവ.വി.എച്ച്.എസ്.എസ്, പേരൂര്‍ പി.എം ഗവ. വി.എച്ച്.എസ്.എസ് എന്നീ സ്‌കൂളുകളാണ് നൂറുമേനി നേടിയത്. 58 വിദ്യാര്‍ഥികളാണ് ഇവിടെ വിജയിച്ചത്.