കൊച്ചി: പറവൂര്‍ മൂത്തകുന്നത്ത് ബിവറേജസ് കോര്‍പ്പറേഷന്റെ ഔട്ട്‌ലെറ്റിനു മുന്നില്‍ സമാധാനപരമായി ഒറ്റയാള്‍ സമരം നടത്തിയിരുന്ന അംഗപരിമിതനെ പൊലിസ് മര്‍ദിച്ച സംഭവത്തെക്കുറിച്ച് അന്വേഷിക്കാന്‍ സംസ്ഥാന മനുഷ്യാവകാശ കമ്മിഷന്‍ ഉത്തരവ്. സ്റ്റുഡന്റ് പൊലിസ് കേഡറ്റായ മകന്റെ മുന്നിലിട്ട് പൊലിസ് ഇയാളെ മര്‍ദിക്കുന്ന വിഡിയോയുടെ പശ്ചാത്തലത്തിലാണ് കമ്മിഷന്‍ ഉത്തരവിറക്കിയത്.
സമൂഹ മാധ്യമങ്ങളില്‍ പ്രചരിക്കുന്ന വിഡിയോ ദൃശ്യങ്ങള്‍ക്ക് പിന്നിലുള്ള യാഥാര്‍ഥ്യം ഡിവൈ.എസ്.പി റാങ്കില്‍ കുറയാത്ത പൊലിസുദ്യോഗസ്ഥന്‍ അന്വേഷിക്കണമെന്ന് കമ്മിഷന്‍ ആക്റ്റിങ് അധ്യക്ഷന്‍ പി.മോഹനദാസ് ആവശ്യപ്പെട്ടു. എറണാകുളം ജില്ലാ പൊലിസ് മേധാവിക്കാണ് ഉത്തരവ് നല്‍കിയത്. ഒരു മാസത്തിനകം റിപ്പോര്‍ട്ട് സമര്‍പ്പിക്കണം.
വിഡിയോ ദൃശ്യങ്ങള്‍ മനഃസാക്ഷിയെ നടുക്കുന്നതാണെന്ന് കമ്മിഷന്‍ ഉത്തരവില്‍ നിരീക്ഷിച്ചു. സര്‍ക്കാര്‍ സ്ഥാപനത്തിനു മുന്നില്‍ സമാധാനപരമായി സമരം ചെയ്യാന്‍ സാധാരണകാര്‍ക്ക് അവകാശമില്ലേയെന്ന് കമ്മിഷന്‍ ചോദിച്ചു. അംഗപരിമിതന്‍ രാജ്യത്ത് നിലവിലുള്ള ഏതെങ്കിലും നിയമം ലംഘിച്ചതായി ദൃശ്യങ്ങളില്‍ നിന്നും മനസിലാവുന്നില്ല. നിയമം അറിയാവുന്ന മകന്‍ പൊലിസിന്റെ ചെയ്തികളിലെ നീതികേട് ചൂണ്ടികാണിക്കുന്നതും ദൃശ്യങ്ങളില്‍ കാണാം.
എന്നാല്‍ വിദ്യാര്‍ഥിയുടെ വാദങ്ങള്‍ പൊലിസ് നിഷ്‌കരുണം തള്ളി. പൊലിസിന്റെ നിയമവിരുദ്ധമായ പ്രവര്‍ത്തനങ്ങള്‍ കണ്ട് വിദ്യാര്‍ഥി വിഷമിക്കുന്നതും ദ്യശ്യങ്ങളിലുണ്ടെന്ന് കമ്മിഷന്‍ വ്യക്തമാക്കി.