കൊച്ചി: വരാപ്പുഴ ദേവസ്വംപാടത്ത് വീടാക്രമണത്തെ തുടര്‍ന്ന് ഗൃഹനാഥന്‍ ആത്മഹത്യ ചെയ്ത കേസില്‍ ശ്രീജിത്തിനെ സി.പി.എം കുടുക്കിയതാണെന്ന് അമ്മ ശ്യാമളയും സഹോദരന്‍ രഞ്ജിത്തും.സി.പി.എം പ്രാദേശിക നേതാക്കളുടെ നേതൃത്വത്തിലാണ് സംഭവത്തില്‍ തന്റെ മകനെ പ്രതിചേര്‍ക്കാന്‍ ഗൂഢാലോചന നടന്നത്. 

ഇതിനുള്ള തെളിവ് ലഭിച്ചിട്ടുണ്ടെന്നും അമ്മയും സഹോദരനും പറഞ്ഞു. മുന്‍ വാര്‍ഡ് മെമ്പറും സി.പി.എം പ്രാദേശിക നേതാവുമായ പ്രിയ ഭരതന്റെ വീട്ടിലാണു ഗൂഢാലോചന നടന്നതെന്നും ഇവരുടെ നേതൃത്വത്തിലാണു പ്രതിപ്പട്ടിക തയാറാക്കിയതെന്നും ശ്യാമള ആരോപിച്ചു.
രാഷ്ട്രീയ ഗൂഢാലോചനയുടെ ഭാഗമായിട്ടാണ് കേസില്‍ മകനെ പൊലിസ് പിടികൂടിയത്. സസ്‌പെന്‍ഷന്‍ ലഭിച്ച എറണാകുളം റൂറല്‍ പൊലിസ് മേധാവിയായിരുന്ന എ.വി ജോര്‍ജിനെ പ്രതിപ്പട്ടികയില്‍ ഉള്‍പ്പെടുത്തി കഠിനമായ ശിക്ഷ നല്‍കണം. എങ്കില്‍ മാത്രമേ മകന്റെ ആത്മാവിന് ശാന്തി ലഭിക്കൂവെന്നും ശ്യാമള പറഞ്ഞു.
ദേവസ്വംപാടത്തെയും സമീപ പ്രദേശങ്ങളിലെയും ചില യുവാക്കളെ ഒതുക്കുന്നതിന്റെ ഭാഗമായിട്ടാകാം സി.പി.എം പ്രാദേശിക നേതൃത്വത്തിന്റെ ഇടപെടലെന്നു കരുതുന്നതായി സഹോദരന്‍ രഞ്ജിത്ത് പറഞ്ഞു.