ഹൈദരാബാദ്: രാജ്യം പോളിയോ വിമുക്തമാണെന്നും ഇതുമായി ബന്ധപ്പെട്ട ആശങ്കകള്‍ അസ്ഥാനത്താണെന്നും കേന്ദ്ര ആരോഗ്യമന്ത്രി ജെ.പി നദ്ദ. ഹൈദരാബാദില്‍ പോളിയോബാധ റിപ്പോര്‍ട്ട് ചെയ്തതുമായി ബന്ധപ്പെട്ട് നടക്കുന്ന പ്രതിരോധ പ്രവര്‍ത്തനങ്ങള്‍ വിലയിരുത്തുവാന്‍ എത്തിയതായിരുന്നു മന്ത്രി.

നിലവില്‍ കുട്ടികള്‍ക്ക് നല്‍കുന്ന വാക്‌സിനെ അതിജീവിക്കാന്‍ കഴിയുന്ന തരത്തിലുള്ള പോളിയോ വൈറസാണ് ഹൈദരാബാദില്‍ റിപ്പോര്‍ട്ട് ചെയ്തിരുന്നത്. എന്നാല്‍ ഇത് ഗുരുതരമായ വൈറസല്ലെന്നും ഇത്തരത്തിലുള്ള വൈറസ് ബാധ മറ്റെവിടേയും റിപ്പോര്‍ട്ട് ചെയ്തിട്ടില്ലെന്നും മന്ത്രി വ്യക്തമാക്കി. കഴിഞ്ഞ അഞ്ചുവര്‍ഷത്തിനിടയില്‍ രാജ്യത്തെവിടേയും പോളിയോ ബാധ റിപ്പോര്‍ട്ട് ചെയ്തിട്ടില്ലെന്നും അദ്ദേഹം പറഞ്ഞു.

ഹൈദരാബാദിലെ രംഗറെഡി ജില്ലയിലാണ് പുതിയ വൈറസിനെ കണ്ടെത്തിയത്. ഇതിന്റെ പശ്ചാത്തലത്തില്‍ നടത്തിയ പ്രതിരോധ പ്രവര്‍ത്തനങ്ങള്‍ മന്ത്രി വിലയിരുത്തി. 2011ല്‍ തന്നെ ഇന്ത്യയില്‍ നിന്നു പോളിയോ ബാധ തുടച്ചു നീക്കിയിരുന്നു. ലോകാരോഗ്യ സംഘടനയുടെ മാര്‍ഗനിര്‍ദേശത്തിന്റെ അടിസ്ഥാനത്തിലാണ് പോളിയോ ബാധയ്‌ക്കെതിരായ പ്രവര്‍ത്തനങ്ങള്‍ നടത്തുന്നത്. കഴിഞ്ഞ നാലുദിവസത്തിനകം രംഗറെഡി ജില്ലയില്‍ 2,10,626 കുട്ടികള്‍ പ്രതിരോധ വാക്‌സിന്‍ സ്വീകരിച്ചതായും മന്ത്രി അറിയിച്ചു.