തിരുവനന്തപുരം : സംസ്ഥാന സര്‍ക്കാരിന് കീഴിലെ ഭിന്നശേഷി ജീവനക്കാരുടെ ഡാറ്റാബേസ് തയ്യാറാക്കല്‍ ശരിയായ രീതിയില്‍ ഉടന്‍ നടപ്പിലാക്കണമെന്ന് ഡിഫറന്റ്‌ലി ഏബിള്‍ഡ് എംപ്ലോയീസ് അസോസിയേഷന്‍ (ഡി.എ.ഇ.എ) തിരുവനന്തപുരം ജില്ലാ പ്രവര്‍ത്തക യോഗം ആവശ്യപ്പെട്ടു.
ഇതുസംബന്ധിച്ച് സാമൂഹ്യ നീതി വകുപ്പ് പുറപ്പെടുവിച്ച ഉത്തരവ് കടലാസിലൊതുങ്ങിയിരിക്കുകയാണ്. ഉത്തരവ് പുറപ്പെടുവിച്ച് മൂന്ന് മാസം കഴിഞ്ഞിട്ടും നാളിതുവരെയായും പല ഡിപ്പാര്‍ട്ടുമെന്റുകളും ഉത്തരവ് എത്തിയിട്ട് പോലുമില്ല.
2018 ഫെബ്രുവരി 28 നു മുന്‍പ് ബന്ധപ്പെട്ട വിവരങ്ങള്‍ നല്‍കണമെന്നാണ് ഉത്തരവില്‍ പറഞ്ഞിരുന്നത്.എന്നാല്‍ ഇതുവരെയും ഇതുസംബന്ധിച്ച പ്രാരംഭ നടപടികള്‍ പോലുമായിട്ടില്ലെന്ന് യോഗം വിമര്‍ശിച്ചു.
2013 ലെ സുപ്രീംകോടതി വിധി പ്രകാരം ഭിന്നശേഷിക്കാര്‍ക്കുള്ള വേക്കന്‍സികളിലെ ബാക്ക് ലോഗ് പരിഹരിക്കുന്നതിനുള്ള നടപടികള്‍ സ്വീകരിക്കുന്നതിന്റെ ഭാഗമായിരുന്നു ഡാറ്റബേസ് തയ്യാറാക്കല്‍.
1995 ലെ ആക്ട് പ്രകാരം ഭിന്നശേഷിക്കാര്‍ക്ക് നിയമനം നല്‍കാനായി കണ്ടെത്തിയ തസ്തികകളില്‍ മൂന്ന് ശതമാനം റിസര്‍വേഷന്‍ പാലിച്ചിട്ടുണ്ടോ, 1996 മുതല്‍ സംവരണം ചെയ്തിട്ടുള്ള മൂന്ന് ശതമാനം തസ്തികകളിലും നിയമനം ഉറപ്പാക്കിയിട്ടുണ്ടോ എന്നിവ കണ്ടെത്താന്‍ കൂടിയായിരുന്നു വിവര ശേഖരണം.
2004 മുതല്‍ നിയമനങ്ങളില്‍ മൂന്ന് ശതമാനം സംവരണം നടപ്പിലാക്കുന്നതിനുള്ള ചുമതല പബ്ലിക് സര്‍വിസ് കമ്മിഷനാണ്.
എന്നാല്‍ 2004 നു മുന്‍പ് എംപ്ലോയ്‌മെന്റ് എക്‌സ്‌ചേഞ്ച് മുഖേന താല്‍ക്കാലികമായി ജോലി ചെയ്ത 2000 ഓളം ഭിന്നശേഷിക്കാര്‍ക്ക് 2013 ല്‍ സൂപ്പര്‍ ന്യൂമററി തസ്തിക സൃഷ്ടിച്ച് സാമൂഹ്യ നീതി വകുപ്പ് നിയമനം നല്‍കിയിരുന്നു.
രണ്ട് വര്‍ഷങ്ങള്‍ക്ക് ശേഷം പ്രത്യേക ഉത്തരവിലൂടെ ഇവരുടെ സര്‍വിസ് ആനുകൂല്യങ്ങള്‍ സര്‍ക്കാര്‍ നിഷേധിച്ചിരിക്കുകയാണ്. അതുകൊണ്ടുതന്നെ പലര്‍ക്കും 10-15 വര്‍ഷം മാത്രമാണ് സര്‍വിസ്. ഇതു കണക്കിലെടുത്ത് നാമമാത്രമായ ഭിന്നശേഷി ജീവനക്കാരുടെ പെന്‍ഷന്‍പ്രായം വര്‍ധിപ്പിക്കണമെന്ന് ആവശ്യപ്പെട്ടിട്ടും സര്‍ക്കാര്‍ അവഗണന തുടരുകയാണെന്ന് യോഗത്തില്‍ വിമര്‍ശനമുയര്‍ന്നു.
വഴുതയ്ക്കാട് ഗവ. വുമണ്‍സ് കോളജില്‍ കൂടിയ യോഗം ഡി.എ.ഇ.എ സംസ്ഥാന പ്രസിഡന്റ് ബിജു ടി.കെ ഉദ്ഘാടനം ചെയ്തു.
ജില്ലാ പ്രസിഡന്റ് വിനോദ് കുമാര്‍ വി.കെ. അധ്യക്ഷനായി. അനിത എന്‍, ബേബി കുമാര്‍ ബി, മോഹനന്‍ പി., ലതാകുമാരി ബി, ജയശങ്കര്‍ മേനോന്‍ എം.ജി, ജേസി എം.വി സംസാരിച്ചു.