ചങ്ങരംകുളം: 70 അടി താഴ്ചയുള്ള കിണറ്റില്‍ വീണ ആട്ടിന്‍കുട്ടിക്ക് ഫയര്‍ഫോഴ്‌സ് രക്ഷകരായി. കഴിഞ്ഞ ദിവസം വൈകുന്നേരം അഞ്ചരക്ക് കപ്പൂര്‍ പഞ്ചായത്തിലെ കൊഴിക്കരയിലാണ് സംഭവം.
കൊഴിക്കര കോട്ടേല വളപ്പില്‍ കമറുദ്ധീന്റെ വീട്ടിലെ 70 അടിയോളം താഴ്ചയുള്ള കിണറ്റിലാണ് ആട്ടിന്‍കുട്ടി വീണത്. നാട്ടുകാര്‍ വിവരമറിയിച്ചതിനെ തുടര്‍ന്ന് കുന്ദംകുളത്ത് നിന്ന് ഫയര്‍ഫോഴ്‌സും മലപ്പുറം ട്രോമാകെയര്‍ പ്രവര്‍ത്തകനായ അബ്ദുട്ടി വളയംകുളവും സ്ഥലത്തെത്തി രാത്രി എട്ട് മണിയോടെ നാട്ടുകാരുടെ സഹായത്താല്‍ ആട്ടിന്‍ കുട്ടിയെ കരക്കെത്തിക്കുകയായിരുന്നു.
ചെറിയ പരിക്കുകളോടെ ആണെങ്കിലും ജീവനോടെ ആട്ടിന്‍കുട്ടിയെ കിണറ്റില്‍ നിന്ന് കരകയറ്റാനായതിന്റെ സന്തോഷത്തിലാണ് ഫയര്‍ഫോഴ്‌സ് അംഗങ്ങളും അബ്ദുട്ടിയും.