കൊണ്ടോട്ടി: കരിപ്പൂര്‍ വിമാനത്താവളം വഴി  കടത്താന്‍ ശ്രമിച്ച 4.273 കിലോഗ്രാം സ്വര്‍ണം കസ്റ്റംസ് പ്രിവന്റീവ് വിഭാഗം പിടികൂടി. ഇന്നലെ പുലര്‍ച്ചെ മസ്‌ക്കത്തില്‍ നിന്നുള്ള ഒമാന്‍ എയര്‍ വിമാനത്തില്‍ കരിപ്പൂരിലെത്തിയ കാസര്‍കോട് നാഷനല്‍ നഗര്‍ ദാറുല്‍ അമാനില്‍ നൗഷാദ് അബ്ദുല്‍ ഹമീദ്(38), കോഴിക്കോട് താമരശ്ശേരി കൂടത്തായി ബസാര്‍ തെഞ്ചീരി വീട്ടില്‍ മുഹമ്മദ് റാഫി(24) എന്നിവരില്‍ നിന്നാണ് സ്വര്‍ണം പിടികൂടിയത്. പിടിച്ചെടുത്ത സ്വര്‍ണത്തിന് 1.3 കോടി രൂപ വില ലഭിക്കും.
 നൗഷാദിന്റെ ബാഗേജിലുണ്ടായിരുന്ന മോട്ടോറിനകത്തായിരുന്നു സ്വര്‍ണം.
രണ്ടു കിലോ വരുന്ന സ്വര്‍ണം യന്ത്രത്തിന്റെ പാര്‍ട്‌സ് രൂപത്തിലാക്കി ഉരുക്കി ഒഴിച്ച നിലയിലായിരുന്നു. റാഫിയുടെ ബാഗേജില്‍ കാര്‍ ക്ലീനറിനകത്തായിരുന്നു സ്വര്‍ണം ഒളിപ്പിച്ചിരുന്നത്. യന്ത്രങ്ങളുടെ രൂപത്തില്‍ ഉരുക്കി ഒഴിച്ചായിരുന്നു ഇയാളും സ്വര്‍ണം എത്തിച്ചത്. 2.273 കിലോഗ്രാം സ്വര്‍ണമാണ് ഇയാളില്‍ നിന്ന് കണ്ടെടുത്തത്.