കൊല്ലം: തമിഴ്‌നാട്ടില്‍ നിന്നും മുട്ട കയറ്റിവന്ന ലോറിക്ക് തീപിടിച്ചു. അപകടത്തില്‍ ആര്‍ക്കും പരുക്കില്ല. ആശ്രാമം മൈതാനത്ത് നിര്‍ത്തിയിട്ടിരുന്ന ലോറിക്ക് ഇന്നലെ പുലര്‍ച്ചെയായിരുന്നു തീപിടിച്ചത്. ലോറിയിലുണ്ടായിരുന്നവര്‍ ഉറക്കത്തിലായിരുന്നെങ്കിലും പരുക്കേല്‍ക്കാതെ രക്ഷപ്പെട്ടു.
കടപ്പാക്കടയില്‍ നിന്നും ഫയര്‍ഫോഴ്‌സെത്തിയാണ് തീയണച്ചത്. ലോറി ഭാഗികമായി കത്തി നശിച്ചു. മൂന്നുലക്ഷം രൂപയുടെ നാശനഷ്ടം കണക്കാക്കുന്നു. കൊല്ലം നഗരത്തില്‍ വിതരണത്തിനു കൊണ്ടുവന്നതായിരുന്നു മുട്ട. തീപിടുത്തത്തിന്റെ കാരണം വ്യക്തമല്ല.