പേരാവൂര്‍: പേരാവൂര്‍ എക്‌സൈസ് പാല്‍ചുരത്ത് വച്ചു നടത്തിയ വാഹനപരിശോധനയില്‍ കാറില്‍ കഞ്ചാവ് കടത്തുകയായിരുന്ന രണ്ടുപേരെ പിടികൂടി. കാലിക്കടവ് പീലിക്കോട് സ്വദേശി ടി.എസ് വില്ലകരയില്‍ ഷക്കീര്‍(30), തൃക്കരിപ്പൂര്‍ സ്വദേശി ടി.പി റവാദ്(25) എന്നിവരാണ് കാര്‍ സഹിതം പിടിയിലായത്. തൃക്കരിപ്പൂര്‍, കാലിക്കടവ് ഭാഗങ്ങളില്‍ വിതരണത്തിനായി കര്‍ണാടകത്തില്‍നിന്ന് കഞ്ചാവ് വാങ്ങി വരുന്നതിനിടെയാണ് ഇവര്‍ പിടിയിലായത്. ഇവരുടെ പക്കല്‍ നിന്ന് 20 പൊതികളിലായി 110 ഗ്രാം കഞ്ചാവ് കണ്ടെടുത്തു. എക്‌സൈസ് കമ്മിഷണറുടെ ഉത്തരമേഖലാ സ്‌ക്വാഡിന്റെ സഹകരണത്തോടെ സ്‌ട്രൈക്കിങ്ങ് ഫോഴ്‌സ് ഡ്യൂട്ടിയുടെ ഭാഗമായാണ് വാഹന പരിശോധന നടത്തിയത്. പേരാവൂര്‍ റേഞ്ച് എക്‌സൈസ് പ്രിവന്റീവ് ഓഫിസര്‍ എം.പി സജീവന്റെ നേതൃത്വത്തിലുള്ള സംഘമാണ് പ്രതികളെയും വാഹനവും കഞ്ചാവു സഹിതം കസ്റ്റഡിയിലെടുത്തത്.