നെയ്യാറ്റിന്‍കര: നെയ്യാറ്റിന്‍കര ജനറല്‍ ആശുപത്രി കാമ്പൗണ്ടില്‍ പ്രവര്‍ത്തിച്ചു കൊണ്ടിരുന്ന ഭക്ഷണശാല തുറന്ന് പ്രവര്‍ത്തിക്കണമെന്ന ആവശ്യം ശക്തമാകുന്നു. ജില്ലാ പഞ്ചായത്ത് അടച്ചു പൂട്ടിയാതായി പറയുന്ന കാന്റീന്‍ എത്രയും വേഗം തുറന്ന് പ്രവര്‍ത്തിക്കണമെന്ന് നാട്ടുകാരും രോഗികളും കൂട്ടിരിപ്പുകാരും ജീവനക്കാരും ആവശ്യപ്പെടുകയാണ്.
മുന്‍ കരാറുകാരന് മാര്‍ച്ച് 31 വരെയായിരുന്നു കാലാവധി. കാലാവധി നീട്ടി കൊടുക്കാനോ പുതിയ ടെണ്ടര്‍ വിളിക്കാനോ ജില്ലാ പഞ്ചായത്ത് തയാറായിട്ടില്ല. മെയിന്റനന്‍സ് നടത്തിയിട്ടു മാത്രമേ അടുത്ത ടെണ്ടര്‍ വിളിക്കൂ എന്നാണ് ബന്ധപ്പെട്ടവര്‍ പറയുന്നത്. കാന്റീന്‍ അടച്ചിട്ടതു കാരണം വിദൂരങ്ങളില്‍ നിന്ന് ആശുപത്രിയിലെത്തുന്ന രോഗികളും കൂട്ടിരിപ്പുകാരും ആശുപത്രി ജീവനക്കാരും ഏറെ ബുദ്ധിമുട്ട് അനുഭവിക്കുകയാണ്.
സമീപത്തുളള ഹോട്ടല്‍ ഉടമകള്‍ ഈ സാഹചര്യം മുതലെടുത്ത് രോഗികളെ കൊള്ളയടിക്കുന്നതായും പരാതിയുണ്ട്. കൂടാതെ ആശുപത്രി മതിലിനോട് ചേര്‍ന്ന് പ്രവര്‍ത്തിക്കുന്ന ബിവറേജസ് ലക്ഷ്യമാക്കി ബിരിയാണി പാഴ്‌സലുകള്‍ വില്‍ക്കുന്ന തട്ടുകടകളും ആശുപത്രിയ്ക്ക് സമീപം നിരന്നു കഴിഞ്ഞു. രോഗികളും ബന്ധുക്കളും ജീവനക്കാരും ഈ ബിരിയാണി തട്ടുകടകളെയാണ് ആശ്രയിക്കുന്നത്. കാന്റീന്‍ അടച്ചതു കാരണം രാത്രികാലങ്ങളിലാണ് രോഗികള്‍ കൂടുതല്‍ പ്രയാസം അനുഭവിക്കുന്നത്. കാന്റീന്‍ പൂട്ടിയിട്ടത് ബന്ധപ്പെട്ടവര്‍ സ്വകാര്യ ഹോട്ടലുടമകളെ സഹായിക്കാന്‍ വേണ്ടിയാണെന്നും ആക്ഷേപം ഉയരുകയാണ്.