പത്തനംതിട്ട: വാഴമുട്ടം താഴൂരില്‍ പത്തുവയസുകാരിയെ പീഡിപ്പിക്കാന്‍ ശ്രമിച്ച ബന്ധുകൂടിയായ യുവാവിനെ പൊലിസ് പിടികൂടി.
റാന്നി സ്വദേശി റജി (32) നെയാണ് പെണ്‍കുട്ടിയുടെ മാതാവിന്റെ പരാതിയെ തുടര്‍ന്ന് പത്തനംതിട്ട പൊലിസ് വ്യാഴാഴ്ച വൈകിട്ടോടെ കസ്റ്റഡിയിലെടുത്തത്. ഇന്നലെ അറസ്റ്റ് രേഖപ്പെടുത്തി.
നിരന്തരം പെണ്‍കുട്ടിയെ ശല്യം ചെയ്തിരുന്ന ഇയാള്‍ കുട്ടിയെ കടന്നുപിടിക്കാന്‍ ശ്രമിച്ചെന്നും പരാതിയില്‍ പറയുന്നു. പെണ്‍കുട്ടിയുടെ വീടിനു സമീപം വാടകയ്ക്ക് താമസിച്ചിരുന്ന ഇയാള്‍ കുട്ടിയെ വീട്ടില്‍ ആരുമില്ലാത്ത സമയം നോക്കി ബൈക്കില്‍ വിളിച്ചുകൊണ്ടുപോയി മൊബൈല്‍ ഫോണില്‍ അശ്ലീല ദൃശ്യങ്ങള്‍ കാണിച്ച് പീഡിപ്പിക്കാന്‍ ശ്രമിച്ചെന്നും അമ്മയുടെ പരാതിയിലുണ്ട്.
സ്‌കൂളില്‍ ചൈല്‍ഡ്‌ലൈന്‍ പ്രവര്‍ത്തകര്‍ നടത്തിയ കൗണ്‍സിലിങ്ങിനിടെയാണ് സംഭവം പുറത്തറിയുന്നത്. തുടര്‍ന്ന് ചൈല്‍ഡ്‌ലൈന്‍ പ്രവര്‍ത്തകരുടെയും നാട്ടുകാരുടെയും സഹായത്തോടെ പൊലിസ് ഇയാളെ പിടികൂടുകയായിരുന്നു. വ്യാഴാഴ്ച വൈകിട്ടോടെ റജിയെ പിടികൂടിയെങ്കിലും മദ്യലഹരിയിലായതിനാല്‍ കൂടുതല്‍ ചോദ്യം ചെയ്യാന്‍ സാധിച്ചില്ല. പ്രതിക്കെതിരേ പോക്‌സോ നിയമപ്രകാരം കേസെടുത്തു.
ശാരീരികമായി ഉപദ്രവിക്കാന്‍ ശ്രമിച്ചതിനും ശല്യം ചെയ്തതിനും ഇയാള്‍ക്കെതിരേ കേസെടുത്തിട്ടുണ്ട്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. പത്തനംതിട്ട എസ്.ഐ വസന്തകുമാറിന്റെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്.