കുന്നംകുളം: സ്വകാര്യ ബസുകളുടെ മത്സരയോട്ടത്തില്‍ ബസുകള്‍ക്കിടയില്‍ കുരുങ്ങി യുവാവിനു പരുക്കേറ്റു. അഞ്ഞൂര്‍ സ്വദേശി വില്ലി ജോണ്‍ (21) നാണു പരുക്കേറ്റത്. ഇയാളെ കുന്നംകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു. വൈകീട്ട് 5.30 ഓടെ കുന്നംകുളം പട്ടാമ്പി റോഡിലെ ദീര്‍ഘദൂര ബസുകള്‍ നിര്‍ത്തിയിടുന്ന സ്‌റ്റോപ്പിനു സമീപമായിരുന്നു അപകടം. ഗുരുവായൂര്‍ കോഴിക്കോട് റൂട്ടിലോടുന്ന അതുല്‍ കൃഷ്ണ ബസ് സ്‌റ്റോപ്പില്‍ നിര്‍ത്തിയിട്ടിരുന്നു.
ഇതിലേക്കു ആളുകള്‍ കയറുന്നതിനിടയില്‍ തൃശൂര്‍ കുറ്റിപുറം റൂട്ടിലോടുന്ന എവര്‍ ഗ്രീന്‍ ബസ് ഇതിന്റെ മുന്നില്‍ പാര്‍ക്കു ചെയ്യുന്നതിനായുള്ള ശ്രമത്തിനിടെയാണു അപകടം. ആളുകള്‍ സ്റ്റോപ്പില്‍ നിന്നും കയറുന്നതിനു തടസമുണ്ടാക്കി മുന്‍പേ പോകുന്ന ബസെന്ന രീതിയില്‍ യാത്രക്കാരെ കയറ്റാനുള്ള ശ്രമമാണു അപകടകാരണം.
ഇരു ബസുകള്‍ക്കുമിടിയില്‍ കുരുങ്ങിയ കാല്‍യാത്രക്കാരനായ യുവാവിനെ സാഹസപെട്ടാണു പുറത്തെടുത്തത്. അപകടം കണ്ടു യാത്രക്കാര്‍ ക്ഷുപിതരായി. ഇരുബസുകളും അമിത വേഗത്തിലായിരുന്നുവെന്നും യാത്രക്കാര്‍ പറഞ്ഞു. ബസുകള്‍ പിടിച്ചെടുത്തു.