മനാമ: ബഹ്‌റൈനില്‍ മരണപ്പെട്ട പേരാമ്പ്ര മൂലാട് സ്വദേശിയും സമസ്ത ബഹ്‌റൈന്‍ സാര്‍ ഏരിയാ ഭാരവാഹിയുമായ പുതിയോട്ടില്‍ ബഷീറിന് സമസ്ത ബഹ്‌റൈന്‍ പ്രവര്‍ത്തകരും സഹപ്രവര്‍ത്തകരും കണ്ണീരോടെ വിട നല്‍കി.

മൃതദേഹം നാട്ടിലേക്ക് കൊണ്ടു പോകുംമുന്പ് ഇവിടെ കുവൈത്തി മസ്ജിദില്‍ നടന്ന മയ്യിത്ത് നിസ്‌കാരത്തിനും തുടര്‍ന്നുള്ള പ്രാര്‍ത്ഥനാ അനുസ്മരണ ചടങ്ങുകള്‍ക്കും സമസ്ത നേതാക്കള്‍ നേതൃത്വം നല്‍കി.

നാട്ടില്‍ നിന്നെത്തിയ സമസ്ത കേന്ദ്ര മുശാവറാംഗവും പണ്ഢിതനുമായ കെ.പി.സി തങ്ങള്‍ വല്ലപ്പുഴയാണ് മയ്യിത്ത് നമസ്‌കാരത്തിന് നേതൃത്വം നല്‍കിയത്.

സമസ്ത ബഹ്‌റൈന്‍ പ്രസിഡന്റ് സയ്യിദ് ഫഖ്‌റുദ്ധീന്‍ കോയ തങ്ങള്‍ അനുസ്മരണ സന്ദേശം നല്‍കി.
സയ്യിദ് ശിഹാബുദ്ധീന്‍ തങ്ങള്‍, സ്വലാഹുദ്ധീന്‍ ഫൈസി വല്ലപ്പുഴ, അശ്‌റഫ് അന്‍വരി, റബീഅ് ഫൈസി അന്പലക്കടവ്, ഹാഫിസ് ശുഐബ്, അബ്ദുറസാഖ് നദ് വി, വി.കെ കുഞ്ഞഹമ്മദ് ഹാജി, എസ്.എം അബ്ദുല്‍ വാഹിദ്, എ.പി ഫൈസല്‍ വില്ല്യാപ്പള്ളി തുടങ്ങി സമസ്ത ബഹ്‌റൈന്‍ കേന്ദ്രഏരിയാ ഭാരവാഹികളും വിവിധ മതരാഷ്ട്രീയ സംഘടനാ നേതാക്കളും സംഘടനാ പ്രതിനിധികളും മയ്യിത്ത് നമസ്‌കാരത്തിലും പ്രാര്‍ഥനകളിലും പങ്കെടുത്തു.

പേരാമ്പ്ര മൂലാട് സ്വദേശിയും സമസ്ത ബഹ്‌റൈന്‍ സാര്‍ ഏരിയാ വൈസ്. പ്രസിഡന്റുമായിരുന്ന പുതിയോട്ടില്‍ ബഷീര്‍ (46) വെള്ളിയാഴ്ച പുലര്‍ച്ചയോടെ ഹൃദയാഘാതത്തെ തുടര്‍ന്നാണ് മരിച്ചത്.

വ്യാഴാഴ്ച രാത്രിയിലെ സ്വലാത്ത് മജ് ലിസില്‍ പങ്കെടുത്ത് തിരിച്ചെത്തിയ ബഷീര്‍ വെള്ളിയാഴ്ച സുബ്ഹി നിസ്‌കാരം കഴിഞ്ഞ ശേഷം തന്റെ കയ്യിന് ചെറിയ വേദനയുണ്ടെന്നും വിശ്രമിക്കുകയാണെന്നും അറിയിച്ചതായി കൂടെ താമസിച്ചിരുന്നവര്‍ പറഞ്ഞു. തുടര്‍ന്നായിരുന്നു മരണം സംഭവിച്ചത്.

മരണപ്പെടുന്നതിന്റെ മണിക്കൂറുകള്‍ മുന്പ് വരെയും ബഹ്‌റൈനിലെ സമസ്തയുടെ വാരാന്ത സ്വലാത്ത് മജ് ലിസ് അടക്കമുള്ള പ്രവര്‍ത്തനങ്ങളില്‍ സജീവമായിരുന്ന ബഷീര്‍ തങ്ങളോട് വിടപറഞ്ഞത് ഇപ്പോഴും സഹപ്രവര്‍ത്തകര്‍ക്ക് വിശ്വസിക്കാനാകുന്നില്ലെന്ന് സംഘടനാ പ്രവര്‍ത്തകര്‍ ഇവിടെ സുപ്രഭാതത്തോട് പറഞ്ഞു.

നടപടി ക്രമങ്ങള്‍ പൂര്‍ത്തിയാക്കി ഞായറാഴ്ച മൃതദേഹം നാട്ടിലെത്തിക്കുമെന്ന് നേരത്തെ അറിയിച്ചിരുന്നുവെങ്കിലും സാങ്കേതിക തടസ്സങ്ങള്‍ കാരണം തിങ്കളാഴ്ച ഉച്ചക്കുള്ള എയര്‍ ഇന്ത്യയിലാണ് മൃതദേഹം കൊണ്ടുപോകാനായത്.
തിങ്കളാഴ്ച രാത്രി 9.മണിക്ക് കോഴിക്കോട് എയര്‍പോര്‍ട്ടിലെത്തിച്ച മൃതദേഹം അര്‍ധരാത്രിയോടെ കുന്നരംവെള്ളി ജുമാ മസ്ജിദ് ഖബറിസ്ഥാനില്‍ ഖബറടക്കിയതായി ബന്ധുക്കള്‍ അറിയിച്ചു.

ഖത്മുല്‍ ഖുര്‍ആന്‍ സദസ്സും പ്രാര്‍ഥനയും ഇന്ന്

മരണപ്പെട്ട ബഷീറിനു വേണ്ടി സമസ്ത ബഹ്‌റൈന്‍ സാര്‍ ഏരിയാ കമ്മറ്റി സംഘടിപ്പിക്കുന്ന ഖത് മുല്‍ ഖുര്‍ആന്‍ സദസ്സും പ്രത്യേക പ്രാര്‍ഥനയും ഇന്ന് രാത്രി 9.30ന് സാറില്‍ വെച്ച് നടക്കുമെന്ന് ബന്ധപ്പെട്ടവര്‍ അറിയിച്ചു. സമസ്ത ബഹ്‌റൈന്‍ ഭാരവാഹികള്‍ പങ്കെടുക്കും. കൂടുതല്‍ വിവരങ്ങള്‍ക്ക് 0097339235021.