കൊണ്ടോട്ടി: കിഴിശ്ശേരി പുല്ലഞ്ചേരി അമ്പല റോഡരികിലെ കാട്ടില്‍ അസ്ഥികൂടം ചാക്കില്‍ ഉപേക്ഷിച്ച നിലയില്‍ കണ്ടെത്തി. ഇന്നലെ രാവിലെ ഒന്‍പതു മണിയോടെ നാട്ടുകാരാണ് ആളൊഴിഞ്ഞ റോഡില്‍ ചാക്കുകെട്ടുകള്‍ കണ്ടത്. തുടര്‍ന്ന് നാട്ടുകാര്‍ പൊലിസില്‍ വിവരം അറിയിക്കുകയായിരുന്നു.
മനുഷ്യന്റെ തലയോട്ടി ഉള്‍പ്പടെയുളളവയാണ് നാലു ചാക്കുകളിലായി ഉണ്ടായിരുന്നത്. റോഡിന്റെ ഇരുഭാഗങ്ങളിലുമായി കാട്ടിലാണ് ചാക്കുകള്‍ കണ്ടെത്തിയത്. ഒരുചാക്ക് അഴിഞ്ഞ നിലയിലായിരുന്നു. അസ്ഥികളോടൊപ്പം ചാക്കില്‍ മണ്ണും സംസ്‌കരിച്ച സമയത്തെ തുണിയും കണ്ടെത്തിയിട്ടുണ്ട്.അസ്ഥികൂടങ്ങള്‍ക്ക് നാലുവര്‍ഷത്തോളം പഴക്കം കാണുമെന്നാണ് പൊലിസ് നിഗമനം. കെട്ടിട ആവശ്യങ്ങള്‍ക്കായി മണ്ണെടുത്ത സമയത്ത് നേരത്തെ മറവ് ചെയ്തവരുടെ അസ്ഥികളാവാം ഇതെന്നും പൊലിസ് പറഞ്ഞു. അസ്ഥികൂടങ്ങള്‍ വിശദപരിശോധനയ്ക്കായി കോഴിക്കോട് മെഡിക്കല്‍ കോളജിലേക്ക് മാറ്റി. സംഭവത്തില്‍ പൊലിസ് കേസെടുത്ത് അന്വേഷണം ആരംഭിച്ചു.