മംഗളൂരു: ഷിരൂരില്‍ മണ്ണിടിച്ചിലില്‍ മൂന്നു പേരെ കാണാതായ ഗംഗാവാലി നദിയില്‍ നടത്തിയ തിരച്ചിലില്‍ ലോറിയുടെ ലോഹഭാഗം കണ്ടെത്തി. നദിയില്‍ രൂപപ്പെട്ട കൂറ്റന്‍ മണല്‍ത്തിട്ടകള്‍ ഡ്രഡ്ജര്‍ ഉപയോഗിച്ച് ഉടച്ചുനീക്കുന്നതിനിടെയാണ് ലോറിയുടെ വാട്ടര്‍ സ്റ്റാന്‍ഡ് കണ്ടെത്തിയത്. 

ലോഹഭാഗങ്ങള്‍ കാണാതായ തന്റെ ലോറിയുടേതാണ് ഉടമ മനാഫ് സ്ഥിരീകരിച്ചു. കൂടാതെ, തടികെട്ടാന്‍ ഉപയോഗിക്കുന്ന കയറും വലിയ ആല്‍മരവും ഡ്രഡ്ജിങ് നടത്തുന്ന സ്ഥലത്ത് നിന്നും കണ്ടെത്തിയിട്ടുണ്ട്. നാളെ രാവിലെ എട്ട് മണിക്ക് മണ്ണ് പൂര്‍ണമായും നീക്കം ചെയ്യാന്‍ ആരംഭിക്കും.

മണ്ണിടിച്ചിലില്‍ കാണാതായ കോഴിക്കോട് കണ്ണാടിക്കല്‍ സ്വദേശി ലോറി ഡ്രൈവര്‍ അര്‍ജുന്‍ ഉള്‍പ്പെടെ മൂന്നു പേര്‍ക്കായാണ് ഇന്ന് തിരച്ചില്‍ ആരംഭിച്ചത്. ഗോവയില്‍ നിന്നെത്തിച്ച ഡ്രഡ്ജര്‍ ഉപയോഗിച്ചാണ് തിരച്ചില്‍ നടത്തുന്നത്. ഡ്രഡ്ജിങ് പൂര്‍ത്തിയാക്കാന്‍ ഏഴ് ദിവസമെങ്കിലും ആവശ്യമാണ്. 

28 മീറ്റര്‍ നീളവും എട്ട് മീറ്റര്‍ വീതിയുമുള്ള ഡ്രഡ്ജറിന് പുഴയുടെ അടിത്തട്ടില്‍ മൂന്നടി ആഴം വരെ മണ്ണെടുക്കാന്‍ സാധിക്കും. ഒരു ഹിറ്റാച്ചി, ക്രെയിന്‍, പുഴയില്‍ ഉറപ്പിച്ചു നിര്‍ത്താന്‍ രണ്ട് ഭാരമേറിയ തൂണുകള്‍ എന്നിവയടങ്ങുന്നതാണ് ഡ്രഡ്ജറിന്റെ പ്രധാന ഭാഗങ്ങള്‍.

നാവികസേനയുടെ സോണാര്‍ പരിശോധനയില്‍ ലോഹ ഭാഗങ്ങള്‍ കണ്ടെത്തിയ സ്ഥലത്തായിരിക്കും ആദ്യഘട്ടം മണ്ണ് നീക്കി പരിശോധന നടത്തുക. ലോറിയുടെ മുകളില്‍ പതിച്ച മുഴുവന്‍ മണ്ണും പാറക്കല്ലുകളും പൊടിച്ച് വെള്ളത്തോടൊപ്പം നീക്കം ചെയ്യും, കൂടാതെ മണ്ണിനൊപ്പം കൂടിക്കിടക്കുന്ന മരങ്ങള്‍ അടക്കമുള്ള മറ്റുവസ്തുക്കളും നീക്കും.

Kerala police's 'Arjun Mission' yields success as metal parts of stolen lorry recovered; owner verifies and confirms recovery, boosting efforts to combat vehicle theft.