ബെല്‍ഗ്രേഡ്: സെര്‍ബിയയില്‍ നടന്ന ചതുര്‍രാഷ്ട്ര ഫുട്‌ബോള്‍ ടൂര്‍ണമെന്റില്‍ അണ്ടര്‍ 16 വിഭാഗത്തില്‍ ഇന്ത്യന്‍ ടീം ജേതാക്കളായി. ഫൈനലില്‍ താജിക്കിസ്ഥാനെ 4-2 എന്ന സ്‌കോറിന് തോല്‍പിച്ചാണ് ഇന്ത്യന്‍ ചുണക്കുട്ടികള്‍ കിരീടം സ്വന്തമാക്കിയത്. ജോര്‍ദാനെയും സെര്‍ബിയേയും പരാജയപ്പെടുത്തിയ ഇന്ത്യ ഏഴുപോയിന്റുമായാണ് ടൂര്‍ണമെന്റിലെ ചാംപ്യന്‍ പട്ടം സ്വന്തമാക്കിയത്. ഈ വര്‍ഷം സെപ്റ്റംബറില്‍ നടക്കുന്ന എ.എഫ്.സി കപ്പിന്റെ മുന്നോടിയായിട്ട് ഇന്ത്യന്‍ ഫുട്‌ബോള്‍ ഫെഡറേഷനും സായിയും ചേര്‍ന്നാണ് ടൂര്‍ണമെന്റ് സംഘടിപ്പിച്ചത്. ഇന്ത്യയുടെ അണ്ടര്‍ 17 ടീമിന്റെ ലോകകപ്പിലെ പ്രവേശനത്തിന് ശേഷം വരും കാലത്തും ലോകകപ്പിലെ പ്രാതിനിധ്യം ഉറപ്പിക്കാനുള്ള ശ്രമങ്ങളുടെ ഭാഗമായിട്ടാണ് ഫുട്‌ബോള്‍ ഫെഡറേഷന്റെ പുതിയ നീക്കം. എ. എഫ്. സി കപ്പിനുള്ള യോഗ്യതാ മത്സരത്തില്‍ ഇന്ത്യ ഇറാഖുമായിട്ടായിരിക്കും മത്സരിക്കാനിറങ്ങുക. ഖത്തര്‍, സിങ്കപ്പൂര്‍, ചൈനീസ് തായ്‌പൊയ് എന്നീ ടീമുകള്‍ക്കൊപ്പമായിരിക്കും ഇന്ത്യയുടെ സ്ഥാനം. യൂറോപ്പിലുള്ള ഇന്ത്യയുടെ ഇക്കഴിഞ്ഞ വിജയം ഭാവിയിലും കൂടുതല്‍ ഗുണം ചെയ്യുമെന്നാണ് വിലയിരുത്തല്‍.