ചെറുപുഴ: സൈബര്‍ കേസിലെ പ്രതിയായ മൊബൈല്‍ ഷോപ്പുടമയുടെ പിതാവിനെയും സഹോദരനെയും മര്‍ദ്ദിച്ച സംഭവത്തില്‍ രണ്ട് ഡി.വൈ.എഫ്.ഐ പ്രവര്‍ത്തകര്‍ അറസ്റ്റില്‍. ചെറുപുഴ സ്വദേശികളായ പി.കെ.അനീഷ്, (32), ശ്രീകാന്ത് എന്ന അശോകന്‍ (35) എന്നിവരെയാണ് ചെറുപുഴ പൊലിസ് അറസ്റ്റ് ചെയ്തത്.
ഇരുവരെയും തളിപ്പറമ്പ് ഫസ്റ്റ് ക്ലാസ്സ് മജിസ്‌ട്രേറ്റ് കോടതി പതിനാല് ദിവസത്തേക്ക് റിമാന്റ് ചെയ്തു. കേസില്‍ മറ്റൊരു പ്രതിയായ അരുണ്‍ പ്രേമന്‍ ഒളിവിലാണ്. മൊബൈല്‍ ഫോണില്‍ സ്ത്രീകളെ വിളിച്ച് അശ്ലീലം സംസാരിച്ച കേസിലെ പ്രതിയാണ് സിജോ സെബാസ്റ്റിയന്‍. മൊബൈല്‍ കടയിലെത്തുന്നവരുടെ തിരിച്ചറിയല്‍ രേഖകള്‍ സമര്‍പ്പിച്ചു വാങ്ങിയ സിംകാര്‍ഡ് ഉപയോഗിച്ചാണ് ഇയാള്‍ സ്ത്രീകളെ ഫോണില്‍ വിളിച്ച് ശല്യം ചെയ്തിരുന്നത്. സംഭവം പുറത്തറിഞ്ഞതോടെ ഒരുസംഘം ആളുകള്‍ യുവാവിന്റെ പിതാവിനെയും സഹോദരനെയും മര്‍ദ്ദിക്കുകയായിരുന്നു. വെള്ളിയാഴ്ച രാത്രിയാണ് സംഭവം നടന്നത്. മര്‍ദ്ദനത്തില്‍ പരുക്കേറ്റ ഇരുവരും കാഞ്ഞങ്ങാട് ആശുപത്രിയില്‍ ചികില്‍സയിലാണ്.