തിരുവനന്തപുരം: ആരോഗ്യ ജാഗ്രതാ യജ്ഞത്തിന് തുടക്കം കുറിച്ചുകൊണ്ടുള്ള മഴക്കാലപൂര്‍വ ക്ലീനിങ് ഡ്രൈവ് പദ്ധതിയുടെ ജില്ലാതല പ്രഖ്യാപനം ആരോഗ്യവകുപ്പ് മന്ത്രി കെ.കെ ശൈലജ നിര്‍വഹിച്ചു. കുടുംബശ്രീ വളന്റിയറില്‍നിന്ന് ഏറ്റുവാങ്ങിയ അജൈവ മാലിന്യക്കിറ്റ് മന്ത്രി, കെ.എസ്.എം.എ ജില്ലാ പ്രസിഡന്റ് മുഹമ്മദ് അസിഫിന് കൈമാറി.
ചാല ഗവ. ഗേള്‍സ് ഹൈസ്‌കൂളില്‍ നടന്ന പരിപാടിയില്‍ മേയര്‍ വി.കെ പ്രശാന്ത് അധ്യക്ഷനായി. മാലിന്യശേഖരണത്തിനായുള്ള വാഹനങ്ങളുടെ ഫ്‌ളാഗ് ഓഫ് കര്‍മം കോര്‍പറേഷന്‍ ആരോഗ്യ സ്റ്റാന്‍ഡിങ് കമ്മിറ്റി ചെയര്‍മാന്‍ കെ. ശ്രീകുമാര്‍ നിര്‍വഹിച്ചു.
വാര്‍ഡ് കൗണ്‍സിലര്‍ എസ്.കെ.പി രമേഷ്, ഹരിതകേരളം മിഷന്‍ കോര്‍ഡിനേറ്റര്‍ ഡി. ഹുമയൂണ്‍, ശുചിത്വമിഷന്‍ കോര്‍ഡിനേറ്റര്‍ ആര്‍. രഞ്ജിത, കെ.എസ്.എം.എ ഭാരവാഹി എസ്. മുരുകന്‍ തുടങ്ങിയവര്‍ പങ്കെടുത്തു.