ന്യൂഡല്‍ഹി: കര്‍ണാടക സര്‍ക്കാര്‍ രൂപീകരണക്കേസില്‍ സുപ്രിം കോടതിയില്‍ ഇന്ന് നിര്‍ണായക വാദം. സര്‍ക്കാരുണ്ടാക്കാന്‍ അവകാശ വാദം ഉന്നയിച്ച് ബി. എസ് യെദിയൂരപ്പ ഗവര്‍ണര്‍ക്കയച്ച രണ്ട് കത്തുകള്‍ കോടതി പരിശോധിക്കും. കത്തിലെ അവകാശ വാദം തെറ്റാണെന്ന് കോണ്‍ഗ്രസ്സ് ചൂണ്ടിക്കാട്ടും. സഭയില്‍ ഭൂരിപക്ഷം തെളിയിക്കാന്‍ അനുവദിക്കണമെന്ന് ബി.ജെ.പിയും വാദിക്കും.

ഇന്നലെ പുലര്‍ച്ച വരെ നീണ്ട നിര്‍ണായക വാദം കേള്‍ക്കലിനൊടുവിലാണ് സുപ്രിം കോടതി യെദ്യൂരപ്പയോട് കത്തുകള്‍ സമര്‍പ്പിക്കാന്‍ ആവശ്യപ്പെട്ടത്. സത്യപ്രതിജ്ഞ തടഞ്ഞില്ലെങ്കിലും ബി.ജെ.പിക്ക് കോടതിയില്‍ നിന്നേറ്റ വലിയ തിരിച്ചടിയായിരുന്നു അത്.

 കഴിഞ്ഞ ചൊവ്വ, ബുധന്‍ ദിവസങ്ങളിലായി രണ്ട് കത്തുകളാണ് സര്‍ക്കാരുണ്ടാക്കാനുള്ള അവകാശവാദം ഉന്നയിച്ച് യെദിയൂരപ്പ  ഗവര്‍ണര്‍ക്ക് കൈമാറിയിരുന്നത്. ഇവയില്‍ ബി.ജെ.പിയുടെ 104 എംഎല്‍എമാര്‍ക്ക് പുറമെ കേവല ഭൂരിപക്ഷം തികക്കാന്‍ എത്ര എം.എല്‍.എമാരുടെ പിന്തുണ രേഖപ്പെടുത്തിയിട്ടുണ്ടെന്ന് കോടതി പരിശോധിക്കും. ഇവര്‍ ആരൊക്കെയാണെന്നും ആരാഞ്ഞേക്കും.

അന്തിമ വിധി സത്യപ്രതിജ്ഞ അടക്കം എല്ലാ നടപടികള്‍ക്കും ബാധകമാണെന്ന് ജസ്റ്റിസ് എ.കെ സിക്രി അധ്യക്ഷനായ ബഞ്ച് ഇന്നലെ ഉത്തരവില്‍ വ്യക്തമാക്കിയിരുന്നു. കത്തിലെ ഉള്ളടക്കം ബോധ്യപ്പെട്ടില്ലെങ്കില്‍ കോടതി ഗവര്‍ണറുടെ തീരുമാനവും സത്യപ്രതിജ്ഞയും മുന്‍കാല പ്രാബല്യത്തോടെ റദ്ദാക്കാനുള്ള സാധ്യത നിയമ വിദഗ്ധര്‍ ചൂണ്ടിക്കാട്ടുന്നു. ഈ സാഹചര്യം ഒഴിവാക്കാനുള്ള വാദങ്ങളാകും ബി.ജെ.പി പ്രധാനമായും നിരത്തുക. സഭയില്‍ വിശ്വാസ വോട്ടെടുപ്പ് നേരിടാന്‍ അനുവദിക്കണം എന്ന് ആവശ്യപ്പെടും. എന്നാല്‍ ഇതിന് 15 ദിവസത്തെ സമയം എന്തിന് എന്ന ചോദ്യം കോടതി ഇന്നലെ ഉന്നയിച്ചിരുന്നു. ഇത്ര ദീര്‍ഘ സമയം ഒരു സര്‍ക്കാരുകള്‍ക്കും അനുവദിച്ചിട്ടില്ലെന്ന കാര്യം കോണ്‍ഗ്രസ് ഇന്നും ചൂണ്ടിക്കാട്ടും.