വടക്കാഞ്ചേരി : സാധാരണക്കാര്‍ക്ക്‌വൈദ്യ ചികിത്സാ രംഗത്ത് ആശ്വാസത്തിന്റെ കൈതാങ്ങുമായി മുളങ്കുന്നത്ത് കാവ് മെഡിക്കല്‍ കോളജില്‍ കേന്ദ്ര പൊതുമേഖലാ സ്ഥാപനമായ എച്ച്.എല്‍.എല്‍ ലൈഫ് കെയര്‍ ലിമിറ്റഡിന്റേയും സംസ്ഥാന സര്‍ക്കാരിന്റേയും സംയുക്ത സംരംഭമായ എച്ച്.എല്‍.എല്‍ ഫാര്‍മസി ആന്റ് സര്‍ജിക്കല്‍സും ഒപ്റ്റിക്കല്‍സും പ്രവര്‍ത്തനമാരംഭിച്ചു. ഹൃദ്രോഗ ശസ്ത്ര ക്രിയാ ഉപകരണങ്ങള്‍ മുതല്‍ ജീവന്‍ രക്ഷാമരുന്നുകള്‍ വരെ കുറഞ്ഞ നിരക്കില്‍ ലഭ്യമാക്കുമെന്നത് പ്രധാന സവിശേഷത. ഹൃദ്രോഗ ശസ്ത്രക്രിയയ്ക്കുള്ള ചികിത്സാ ചിലവ് കുറയ്ക്കുകയെന്ന ലക്ഷ്യത്തോടെ കുറഞ്ഞ നിരക്കില്‍ സ്‌റ്റെന്‍ഡുകള്‍, പേസ് മേക്കറുകള്‍ എന്നിവ ലഭ്യമാക്കും. പൊതു വിപണിയില്‍ 29,500 രൂപ വിലവരുന്ന സ്റ്റെന്‍ഡ് എച്ച്.എല്‍.എല്‍ ഫാര്‍മസിയില്‍ നിന്ന് 23,000 രൂപയ്ക്ക് ലഭിയ്ക്കും. പേസ് മേക്കര്‍ പത്ത് മുതല്‍ 40 ശതമാനം വരെ വില കുറവിലാണ് വില്‍ക്കുക. സര്‍ജിക്കല്‍ ഇംപ്ലാന്റുകള്‍, മരുന്നുകള്‍ ശസ്ത്രക്രിയാ ഉപകരണങ്ങള്‍, ഡിസ്‌പോസബിളുകള്‍ എന്നിവ ഉള്‍പ്പെടെ മെഡിക്കല്‍ ഉല്‍പന്നങ്ങള്‍ക്കും സര്‍ജിക്കല്‍സില്‍ വിലക്കുറവുണ്ട്. രാഷ്ട്രീയ സ്വാസ്ഥ്യ ഭീമ യോജനാ കാര്‍ഡ് ഉള്ളവര്‍ക്ക് സൗജന്യ സേവനവും ഉറപ്പാക്കും. ഒപ്റ്റിക്കല്‍സില്‍ ലെന്‍സുകളും കണ്ണട ഫ്രെയിമുകളും വന്‍ വില കുറവിലാണ് വില്‍ക്കുന്നത്. ഉത്സവാന്തരീക്ഷ നിറവിലായിരുന്നു സംസ്ഥാനത്തെ പതിമൂന്നാമത്തെ എച്ച്.എല്‍.എല്‍ കേന്ദ്രത്തിന്റെ ഉദ്ഘാടനം.