കോങ്ങാട് : കല്ലടിക്കോട് അഞ്ച് യുവാക്കളുടെ മരണത്തിനിടയാക്കിയ അപകടത്തിന് കാരണം കാറിന്റെ അമിതവേഗതയാണെന്ന് പൊലിസിന്റെ പ്രാഥമിക നിഗമനം. അമിതവേഗത്തില്‍ വലതുവശം ചേര്‍ന്നാണ് കാര്‍ വന്നതെന്നും ലോറിയിലേക്ക് ഇടിച്ചുകയറുകയായിരുന്നെന്നും ലോറി ഡ്രൈവര്‍ മൊഴി നല്‍കിയതായും പൊലിസ് വ്യക്തമാക്കി. അപകടത്തിന്റെ സിസിടിവി ദൃശ്യങ്ങളും ലഭിച്ചിട്ടുണ്ട്. .

കല്ലടിക്കോട് അയ്യപ്പന്‍കാവിന് സമീപം ദേശീയ പാതയില്‍ ഇന്നലെ രാത്രി പന്ത്രണ്ടോടുകൂടിയാണ് കാറും ലോറിയും കൂട്ടിയിടിച്ച് അപകടമുണ്ടായത്. അപകടത്തില്‍ കാറിലുണ്ടായിരുന്ന അഞ്ച് യാത്രക്കാരും മരിച്ചു. കോങ്ങാട് മണ്ണാന്തറ സ്വദേശികളായ കെ.കെ. വിജേഷ്, ടി.വി. വിഷ്ണു, രമേശ്, മഹേഷ്, മണിക്കശ്ശേരി സ്വദേശി മുഹമ്മദ് അഫ്‌സല്‍ എന്നിവരാണ് മരിച്ചത്. നാലുപേര്‍ സംഭവസ്ഥലത്തും ഒരാള്‍ ജില്ലാ ആശുപത്രിയിലുമാണ് മരിച്ചത്. പാലക്കാട് കോങ്ങാട് സ്വദേശികളാണ് അപകടത്തില്‍പെട്ടത്. 

മൃതദേഹങ്ങള്‍ പാലക്കാട് ജില്ലാ ആശുപത്രി മോര്‍ച്ചറിയില്‍ സൂക്ഷിച്ചിട്ടുണ്ട്. ഇന്ന് അനുബന്ധ നടപടികള്‍ക്ക് ശേഷം ബന്ധുക്കള്‍ക്ക് വിട്ടുനല്‍കും. പാലക്കാട് ഭാഗത്തുനിന്നും മണ്ണാര്‍ക്കാട് ഭാഗത്തേക്ക് വന്ന കാറും ലോറിയും തമ്മിലാണ് കൂട്ടിയിടിച്ചത്. അപകടത്തിന്റെ അഘാതത്തില്‍ കാര്‍ ലോറിക്കടിയിലേക്ക് കയറിപ്പോയി. കാറില്‍ കുടുങ്ങിയവരെ കാര്‍ വെട്ടിപ്പൊളിച്ചാണ് നാട്ടുകാരും പൊലിസും ചേര്‍ന്ന് പുറത്തെടുത്തത്. കോങ്ങാട് നിന്ന് ഫയര്‍ഫോഴ്‌സും സ്ഥലത്തെത്തിയിരുന്നു. ചാറ്റല്‍മഴയും വാഹനങ്ങളുടെ വേഗതയുമാണ് അപകടത്തിന് കാരണമെന്ന് അപകടം നടന്ന പ്രദേശത്തെ ആളുകളും പറയുന്നു. യുവാക്കള്‍ സഞ്ചരിച്ച കാര്‍ വാടകക്ക് എടുത്തതാണ്.