കല്‍പറ്റ: വയനാടിന്റെ പ്രിയപ്പെട്ട മകളാവാനെത്തുന്ന പ്രിയങ്കാ ഗന്ധിയെ സ്വീകരിക്കാന്‍ കല്‍പറ്റ നഗരത്തില്‍ വന്‍ ജനാവലി. വയനാട് ലോക് സഭ മണ്ഡലത്തിലെ ഉപതെരഞ്ഞെടുപ്പില്‍ നാമനിര്‍ദേശ ' പത്രിക സമര്‍പ്പിക്കാനുള്ള റോഡ് ഷോയില്‍ പങ്കാളികളാവാന്‍ ആയിരങ്ങളാണ് കല്‍പറ്റയില്‍ എത്തിയിരിക്കുന്നത്.  

പ്രിയങ്കയുടെ പത്രികാ സമര്‍പ്പണം കളറാക്കാന്‍ സംസ്ഥാന നേതൃത്വം അപ്പാടെ വയനാട്ടില്‍ എത്തിയിട്ടുണ്ട്. കോണ്‍ഗ്രസ് ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാരും വയനാട്ടിലെത്തിയിട്ടുണ്ട്. സോണിയാഗാന്ധിയും രാഹുല്‍ ഗാന്ധിയും പ്രിയങ്കക്കൊപ്പമുണ്ട്. 

11 മണിക്ക് നിശ്ചയിച്ച പരിപാടിക്ക് രാവിലെ ഏഴു മണി മുതല്‍ ആളുകള്‍ എത്തിത്തുടങ്ങിയിരുന്നു. രാവിലെ മഴ മൂടിക്കെട്ടിയിരുന്ന അന്തരീക്ഷം പതിയെ വെയില്‍ പരന്നിട്ടുണ്ട്. ചുരം കയറിയെത്തുന്ന ബസുകളിലും കാറുകളിലുമൊക്കെ പ്രിയങ്കയെ കാണാനുള്ളവരുടെ തിരക്കുണ്ടായിരുന്നു.

കൈപ്പത്തി ചിഹ്നം പതിച്ച ടീ ഷര്‍ട്ടുകളണിഞ്ഞും പ്രിയങ്കക്ക് സ്വാഗതമോതിയുള്ള പ്ലക്കാര്‍ഡുകളേന്തിയുമാണ് ആളുകളെത്തിയത്.  ത്രിവര്‍ണ ബലൂണുകള്‍ കാഴ്ചയെ മനോഹരമാക്കുന്നുണ്ട്.  ഗോത്രവര്‍ഗ യുവാക്കള്‍ അണിനിരക്കുന്ന 'ഇതിഹാസ' ബാന്‍ഡ് വാദ്യ സംഘം ഉള്‍പ്പെടെ റാലിയില്‍ പങ്കെടുക്കുന്നുണ്ട്.