പഴയങ്ങാടി: മാടായിപ്പാറയില്‍ രണ്ടിടങ്ങളിലായി വൈദ്യുതതൂണുകള്‍ അപകടാവസ്ഥയില്‍. വാഹനമിടിച്ച് തകര്‍ന്നതും കത്തിനശിച്ചതുമായി വൈദ്യുത തൂണുകളാണ് മാറ്റി സ്ഥാപിക്കാതെ നില്‍ക്കുന്നത്. കോണ്‍ക്രീറ്റ് നിര്‍മിതമായ വൈദ്യുതതൂണ്‍ വാഹനമിടിച്ച് തകര്‍ന്നതാണെങ്കില്‍ മരത്തടിയാലുള്ള വൈദ്യുത തൂണ്‍ മാടായിപ്പാറയിലെ തീപിടിത്തത്തില്‍ താഴ്ഭാഗം കത്തിനശിച്ചതാണ്. പ്രത്യക്ഷത്തില്‍ ഇവ കാണുന്നില്ലെങ്കിലും ഹൈടെന്‍ഷന്‍ വൈദ്യുത ലൈന്‍ കടന്നുപോകുന്നത് ഇതിലൂടെയാണ്. മാടായിപ്പാറയിലെ റസ്റ്റ് ഹൗസിന് പിറക് വശത്തെ പാലമരത്തിന് സമീപമായാണ് ഇതു സ്ഥിതി ചെയ്യുന്നത്. റസ്റ്റ് ഹൗസിന് മുന്നിലെ അപകട വളവിലാണ് വാഹനമിടിച്ച് കോണ്‍ക്രീറ്റ് വൈദ്യുതതൂണ്‍ താഴ്ഭാഗം തകര്‍ന്ന് കിടക്കുന്നത്. സംസ്ഥാനത്തെ വിവിധഭാഗങ്ങളില്‍ നിന്നായി സ്‌കൂള്‍ വിദ്യാര്‍ഥികളും പരിസ്ഥിതി പ്രവര്‍ത്തകരും സന്ദര്‍ശിക്കുന്ന സ്ഥലമാണിത്.