മാനന്തവാടി: കാട്ടാന ഭീതിയില്‍ തലപ്പുഴ, വരയാല്‍, കണ്ണോത്ത്മല നിവാസികള്‍. കഴിഞ്ഞ ഒരാഴ്ചയിലധികമായി ജനവാസ കേന്ദ്രമായ കണ്ണോത്ത് മലയില്‍ കാട്ടാനകള്‍ ഭീതി വിതക്കാന്‍ തുടങ്ങിയിട്ട്. പ്രദേശത്തെ കൃഷിയിടങ്ങളിലെത്തിയ കാട്ടാനകള്‍ തലകോട്ടില്‍ ശ്രീനിവാസന്‍, ബിജു, വിജയകുമാര്‍, കുന്നുമ്മല്‍ കണാരന്‍, കുട്ടപ്പന്‍, മൊയ്തീന്‍ എന്നിവരുടെ കുലച്ച നേന്ത്രവാഴ, തെങ്ങ്, കമുക് എന്നിവ വ്യാപകമായി നശിപ്പിച്ചു.
ഇവ പകല്‍ സമയങ്ങളില്‍ പോലും ജനവാസ കേന്ദ്രത്തില്‍ തങ്ങുന്നതിനാല്‍ പ്രദേശവാസികള്‍ ഭീതിയിയോടെയാണ് കഴിയുന്നത്. നിരവധി തവണ വനം വകുപ്പ് അധികൃതരെ വിവരമറിയിച്ചെങ്കിലും കാട്ടാനകളെ തുരത്താന്‍ നടപടി സ്വീകരിച്ചില്ലെന്ന് നാട്ടുകാര്‍ ആരോപിച്ചു. ആന ശല്യം രുക്ഷമായതൊടെ പ്രദേശവാസികള്‍ ആക്ഷന്‍ കമ്മിറ്റി രൂപീകരിച്ച് സമര പരിപാടികള്‍ക്ക് ഒരുങ്ങുകയാണ്.
ബേഗൂര്‍, പേര്യ റെയ്ഞ്ചുകളെ തമ്മില്‍ ബന്ധിപ്പിക്കുന്ന 400 മീറ്റര്‍ ദുരം വൈദ്യുതി കമ്പിവേലി സ്ഥാപിച്ചാല്‍ കാട്ടാന ശല്യത്തിന് പരിഹാരം കാണാന്‍ കഴിയും. ഈ ആവശ്യമുന്നയിച്ച് ആക്ഷന്‍ കമ്മിറ്റിയുടെ ആഭിമുഖ്യത്തില്‍ ഈ മാസം 29ന് വരയാല്‍ ഫോറസ്റ്റ് സ്റ്റേഷന്‍ ഉപരോധിക്കും.