ആലുവ: മുട്ടം മെട്രോ യാര്‍ഡിനു സമീപത്തെ റെയിവേ ട്രാക്കില്‍ ടെയിനിടിച്ച് എട്ട് പോത്തുകള്‍ ചത്ത സംഭവത്തില്‍ എറണാകുളം റെയിവേ പൊലിസ് കേസെടുത്തു. എന്നാല്‍ ഉടമയെ തിരിച്ചറിഞ്ഞിട്ടില്ല. ഇന്നലെ പുലര്‍ച്ചെ 2.30ന് കടന്നുപോയ തിരുവനന്തപുരം-മംഗലാപുരം എക്‌സ്പ്രസ് ട്രെയിനാണ് 12ഓളം വരുന്ന പോത്തിന്‍ കൂട്ടത്തെ ഇടിച്ചത്. അപകടത്തെ തുടര്‍ന്ന് ഒരു മണിക്കൂറോളം ട്രെയിന്‍ പിടിച്ചിട്ടു. ഇടിയുടെ ആഘാതത്തില്‍ എട്ട് പോത്തുകള്‍ ചാവുകയും ബാക്കിയുള്ളതിനു പരുക്കേല്‍ക്കുകയും ചെയ്തു.
വളര്‍ത്തുമൃഗങ്ങളെ പൊതുസ്ഥലങ്ങളില്‍ മേയാന്‍ വിടുന്ന ഉടമകള്‍ക്കെതിരേ ശക്തമായ നടപടിയെടുക്കുമെന്ന് എസ്.പി.സി.എ അധ്യക്ഷ കൂടിയായ ജില്ലാ പഞ്ചായത്ത് പ്രസിഡന്റ് ആശാ സനല്‍ പറഞ്ഞു. എസ്.പി.സി.എയുടെ നിര്‍ദേശപ്രകാരം വെറ്ററിനറി സര്‍ജന്‍ ഡോ. ലിസി ആന്റണി പരുക്കേറ്റ പോത്തുകള്‍ക്ക് ചികിത്സ നല്‍കി.