കാട്ടാക്കട: കൂട്ടം തെറ്റി ഇടുക്കി ചിന്നകനാല്‍ ടൗണിലിറങ്ങി വികൃതി കാട്ടിയ കുട്ടികൊമ്പന്‍ ഇനി കോട്ടൂര്‍ ആന പാര്‍ക്കിന് സ്വന്തം. കോട്ടൂര്‍ കാപ്പുകാട് ആന പുനരധിവാസ കേന്ദ്രത്തില്‍ ഇന്ന് പുലര്‍ച്ചെ 3ന് എത്തിയ കുട്ടിയാനയെകാത്ത് വനപാലകരും പാപ്പാന്മാരും അടങ്ങുന്ന സംഘം നിന്നിരുന്നു.
പ്രത്യേകം സജ്ജീകരിച്ച കൂട്ടില്‍ കൊണ്ടു വന്ന കൊമ്പനെ ഇവിടെയുള്ള പ്രത്യേക കൂട്ടിലാണ് പാര്‍പ്പിച്ചത്. അമ്മയാന ചരിഞ്ഞതിനെ തുടര്‍ന്ന് കൂട്ടം തെറ്റി നാട്ടിലിറങ്ങിയ ആറു മാസം പ്രായമുള്ള കുട്ടിയാനയാണിത്. കഴിഞ്ഞ ചൊവ്വാ ഉച്ചയോടെയാണ് കുട്ടിയാന ചിന്നക്കനാല്‍ ടൗണിലിറങ്ങിയത്. മൂന്നു ദിവസമായി ആനയിറങ്കല്‍ ജലാശയത്തിന് സമീപമുള്ള വനമേഖലയില്‍ വനംവകുപ്പ് ഒരുക്കിയ താല്‍ക്കാലിക അഭയകേന്ദ്രത്തില്‍ കുട്ടിയാനയെ താമസിപ്പിച്ചിരിക്കുകയായിരുന്നു. വ്യാഴാഴ്ചയാണ് കുട്ടിയാനയുടെ അമ്മയുടേതെന്നു കരുതുന്ന 25 വയസുള്ള പിടിയാനയുടെ ജഡം കണ്ടെത്തിയത്. മൂന്നു ദിവസത്തിലധികം പഴക്കമുണ്ടായിരുന്ന ജഡം പോസ്റ്റ്‌മോര്‍ട്ടത്തിന് ശേഷം വനത്തിനകത്ത് ദഹിപ്പിച്ചു.
ചരിഞ്ഞ ആനയുടെ സംഘത്തിലുള്ള മറ്റ് ആനകളെത്തി കൂട്ടിക്കൊണ്ടുപോകുമെന്ന പ്രതീക്ഷയിലാണ് ഇന്നലെ വരെ മരപ്പാലത്തെ താല്‍ക്കാലിക അഭയകേന്ദ്രത്തില്‍ കുട്ടിയാനയെ താമസിപ്പിച്ചത്. എന്നാല്‍ സമീപത്തെ വനമേഖലയില്‍ ചുറ്റിത്തിരിഞ്ഞ ആനക്കൂട്ടങ്ങളൊന്നും കുട്ടിയാനയുടെ സമീപത്തേക്ക് അടുക്കാത്തതിനാല്‍ ഇന്നലെ തന്നെ കോട്ടൂരിലെ ആനവളര്‍ത്തല്‍ കേന്ദ്രത്തിലേക്ക് കൊണ്ടുപോകാന്‍ വനംവകുപ്പ് അധികൃതര്‍ തീരുമാനിക്കുകയായിരുന്നു. ചീഫ് വൈല്‍ഡ് ലൈഫ് വാര്‍ഡന്‍ പി.കെ കേശവന്റെ അനുമതി ലഭിച്ചതോടെ ഇന്നലെ വൈകിട്ട് തിരിച്ച് കുട്ടിയാനയെ ഇന്ന് കോട്ടൂരിലേക്ക് എത്തിക്കുകയായിരുന്നു.
ഡോ. സി.എസ് ജയകുമാറിനെ കൂടാതെ കോട്ടൂര്‍ ആനവളര്‍ത്തല്‍ കേന്ദ്രത്തിലെ വെറ്ററിനറി ഓഫിസര്‍ ഡോ. ദയാമോന്‍ എന്നിവര്‍ അടങ്ങുന്ന സംഘമാണ് ആനയെ ഇവിടെ എത്തിച്ചത്. കോട്ടൂരില്‍ എത്തിച്ച ആനയ്ക്ക് ലാക്ടോജനും മരുന്നും നല്‍കി. വലിയ ആരോഗ്യ പ്രശ്‌നങ്ങള്‍ ഇല്ലെന്നാണ് വനം വകുപ്പ് പറയുന്നത്. സന്ദര്‍ശകരെ ആരേയും കടത്തി വിടാതെയുള്ള സ്ഥലത്താണ് കൊമ്പനെ പാര്‍പ്പിച്ചിരിക്കുന്നത്. മുറയ്ക്ക് മരുന്നും ആഹാരവും നല്‍കിയതിനുശേഷമേ സന്ദര്‍ശകരെ ഇവിടെ എത്തിക്കൂ. കൊമ്പല്‍ കൂടി വന്നതോടെ ആനകളുടെ എണ്ണം 17 ആയി ഉയര്‍ന്നു.