പെരിന്തല്‍മണ്ണ: മലപ്പുറം ലേക്‌സഭാ മണ്ഡലം തെരഞ്ഞെടുപ്പിന്റെ ഭാഗമായി നാളെ പെരിന്തല്‍മണ്ണയില്‍ നടക്കുന്ന മണ്ഡലം യു.ഡി.എഫ് കണ്‍വന്‍ഷനില്‍ മുന്‍ മുഖ്യമന്ത്രി ഉമ്മന്‍ ചാണ്ടി, പ്രതിപക്ഷ നേതാവ് രമേശ് ചെന്നിത്തല, പാണക്കാട് സയ്യിദ് സാദിഖലി ശിഹാബ് തങ്ങള്‍, എം.പി അബ്ദുസ്സമദ് സമദാനി, സ്ഥാനാര്‍ഥി പി.കെ കുഞ്ഞാലിക്കുട്ടി എന്നിവര്‍ പങ്കെടുക്കും. വൈകീട്ട് നാലിന് കോഴിക്കോട് റോഡിലെ പഠിപ്പുര സ്റ്റേഡിയത്തിലാണ് പരിപാടി. സംസ്ഥാന യു.ഡി.എഫ് നേതാക്കളുടെ 23ലെ സംഗമം, ഇതിനോടകം മണ്ഡലത്തില്‍ ആരംഭിച്ച പ്രചാരണ പ്രവര്‍ത്തനങ്ങള്‍ക്ക് കൂടുതല്‍ ആവേശം പകരുന്നതാവും. കരിങ്കല്ലത്താണി തിയ്യാട്ട് ബില്‍ഡിംഗില്‍ നടന്ന താഴെക്കോട് പഞ്ചായത്ത് മുസ്‌ലിം ലീഗ് തെരെഞ്ഞെടുപ്പ് കണ്‍വന്‍ഷന്‍ മഞ്ഞളാംകുഴി അലി എം.എല്‍.എ ഉദ്ഘാടനം ചെയ്തു. ജനാധിപത്യ ചേരിയെ ശക്തിപ്പെടുത്തുന്നതിന് കുഞ്ഞാലിക്കുട്ടിയുടെ വിജയം അനിവാര്യമാണെന്ന് അദ്ദേഹം പറഞ്ഞു. മുന്‍ എം.എല്‍.എ കളത്തില്‍ അബ്ദുല്ല മുഖ്യപ്രഭാഷണം നടത്തി. യു.ഡി.എഫ് മണ്ഡലം കണ്‍വീനര്‍ എ.കെ നാസര്‍, എ.കെ മുസ്തഫ, പി.ടി ഖാലിദ് മാസ്റ്റര്‍, വി.പി റഷീദ് മാസ്റ്റര്‍, കെ.കെ ജാഫര്‍ മാസ്റ്റര്‍, കെ.പി ഹുസൈന്‍, വി.പി.കെ യൂസഫ് ഹാജി സംസാരിച്ചു.