ലോസ് ആഞ്ചലസ്: നാലുകാലും രണ്ടു നട്ടെല്ലുമായി ജനിച്ച കുഞ്ഞിന്റെ കാലുകള്‍ ചിക്കാഗോയില്‍ നടന്ന അപൂര്‍വ ശാസ്ത്രക്രിയയിലൂടെ വിജയകരമായി വേര്‍പെടുത്തി. അപൂര്‍വതകളുമായി ജനിച്ച പത്തു മാസം പ്രായമുള്ള ഐവറികോസ്റ്റ് പെണ്‍കുട്ടി ഡൊമിനിക്കയുടെ കാലുകളാണ് അഞ്ചു ഡോക്ടര്‍മാരുടെ ആറു മണിക്കൂര്‍ നേരത്തെ അപൂര്‍വ ശാസ്ത്രക്രിയയിലൂടെ വിജയകരമായി വേര്‍പ്പെടുത്തിയത്. കഴിഞ്ഞ എട്ടിനാണ് പാര്‍ക്ക് റിഡ്ജിലെ അഡ്വോക്കറ്റ് ചില്‍ഡ്രന്‍സ് ആശുപത്രി അപൂര്‍വ ചികിത്സക്ക് വേദിയായത്.

ഡൊമിനിക്കയുടേത് അപൂര്‍വമായ നാഡി രോഗമായിരുന്നുവെന്നും ചികിത്സക്കായി ദത്തെടുത്ത ചിക്കാഗോയിലെ കുടുംബത്തോടെപ്പം സുഖമായിരിക്കുന്ന ഡൊമിനിക്ക വൈകാതെ തന്നെ സ്വന്തം വീട്ടിലേക്ക് തിരിച്ചുപോകുമെന്നും ചികിത്സാ സംഘത്തിലെ ഡോക്ടര്‍മാര്‍ മാധ്യമങ്ങളോട് പറഞ്ഞു. 

ഡൊമിനിക്കയുടെ കുടുംബത്തെ കുറിച്ചുള്ള കൂടുതല്‍ വിവരങ്ങള്‍ പുറത്തു പറയാന്‍ ഡോക്ടര്‍മാര്‍ തയാറായില്ല. ഡൊമിനിക്കയുടെ ചികിത്സയ്ക്ക് ശേഷം ഒരുപാട് ചിത്രങ്ങള്‍ അവര്‍ക്ക് അയച്ചുനല്‍കിയെന്നും കുടുംബം വലിയ സന്തോഷത്തിലാണെന്നും ഡോക്ടര്‍ പറഞ്ഞു.