കാക്കനാട്:  തൃക്കാക്കര നഗരസഭയില്‍ ഭരണമാറ്റത്തിന് വഴിയൊരുക്കി കോണ്‍ഗ്രസ് വിമതനായ വൈസ്‌ചെയര്‍മാന്റെ അപ്രതീക്ഷിത നീക്കം. ഇന്നലെ നടന്ന നഗരസഭ കൗണ്‍സില്‍ യോഗത്തില്‍ ചെയര്‍പേഴ്‌സണ്‍ കെ.കെ.നീനുവിനോട് ഇടഞ്ഞതോടെ വൈസ്‌ചെയര്‍മാന്‍ സാബു ഫ്രാന്‍സിസ് പ്രതിപക്ഷ കൗണ്‍സിലര്‍മാരുടെ ഇരിപ്പിടത്തിലേക്ക് മാറി ഇരിക്കുകയായിരുന്നു. ഒരു വര്‍ഷക്കാലമായി ഭരണപക്ഷത്തിനൊപ്പം ഉറച്ചുനിന്ന വൈസ് ചെയര്‍മാന്‍ പ്രതിപക്ഷത്തിനൊപ്പം ചേര്‍ന്നതോടെ തൃക്കാക്കര നഗരസഭ ഭരണം കയ്യാളുന്ന ഇടതുപക്ഷത്തിന് ഭീഷണിയായിരിക്കുകയാണ്.
ഒരാളുടെ ഭൂരിപക്ഷമുള്ള ജില്ലാ ആസ്ഥാനത്തെ നഗരസഭയില്‍ ഇടത് മുന്നണി ഭരണം നിലനിര്‍ത്താന്‍ കിണഞ്ഞു ശ്രമിക്കുമ്പോഴാണ് വൈസ് ചെയര്‍മാന്‍ ഭരണപക്ഷത്തിനേതിരേ പരസ്യമായി രംഗത്തെത്തിയിരിക്കുന്നത്. സി.പി.എം വിമത കൗണ്‍സിലര്‍ എം.എം നാസറും ചെയര്‍പേഴ്‌സണിനെതിരേ പരസ്യമായി രംഗത്തെത്തിയതും നഗരസഭ ഭരണത്തിന്റെ ഭാവി അനിശ്ചിതത്വത്തിലാക്കി.
 നഗരസഭക്ക് മൂന്ന് കോടി രൂപയുടെ വരുമാനം ലഭിക്കുന്ന പ്രവൃത്തിയായ, 8.7 കിലോമീറ്റര്‍ ചുറ്റളവില്‍ സ്വകാര്യ മൊബൈല്‍ കമ്പനിയുടെ കേബിള്‍ സ്ഥാപിക്കുന്നത്  കൗണ്‍സില്‍ അജണ്ടയില്‍ ഉള്‍പ്പെടുത്താതെ രഹസ്യമായി അനുമതി നല്‍കാനുളള നീക്കം അനുകൂലിക്കാനാവില്ലെന്ന് വൈസ് ചെയര്‍മാന്‍  വ്യക്തമാക്കിയതാണ് തര്‍ക്കങ്ങള്‍ക്ക് കാരണം.  കേബിള്‍ കമ്പനിയുടെ ആവശ്യം പാര്‍ട്ടിയോട് ആലോചിച്ച് തീരുമാനമെടുക്കാമെന്ന ചെയര്‍പേഴ്‌സണ്‍ന്റെ നിലപാട് വൈസ് ചെയര്‍മാനെ ചൊടിപ്പിച്ചു. ഇത് ഇരുവരും തമ്മില്‍ ഇടയാന്‍ കാരണമായി. തുടര്‍ന്ന് വികാരഭരിതനായ വൈസ്‌ചെയര്‍മാന്‍ സാബു ഫ്രാന്‍സിസ് പ്രതിപക്ഷ നിരയിലേക്ക് സ്ഥാനം മാറ്റുകയായിരുന്നു. കേബിള്‍ കമ്പനിക്ക് അനുമതി നല്‍കുന്ന വിഷയത്തില്‍ കൗണ്‍സിലില്‍ തീരുമാനിച്ചാല്‍ മതിയെന്നായിരുന്നു വൈസ് ചെയര്‍മാന്റെ നിലപാട്. നഗരസഭയ്ക്ക് നാല് കോടി രൂപയുടെ വരുമാനം ലഭിക്കുന്ന ഗ്യാസ് പൈപ്പ് ലൈന്‍ സ്ഥാപിക്കാന്‍ അനുമതി നല്‍കുന്ന കാര്യത്തിലും കൗണ്‍സിലില്‍ തീരുമാനമെടുക്കാന്‍ വൈകുന്നുവെന്ന് അദ്ദേഹം പറഞ്ഞു.  
43 അംഗകൗണ്‍സിലില്‍ രണ്ട് വിമതന്മാരുടെ പിന്തുണയോട് കൂടിയാണ് ഇടത് ഭരണം നിലനിര്‍ത്തുന്നത്. 21 അംഗങ്ങളുള്ള യു.ഡി.എഫ്, കോണ്‍ഗ്രസ് വിമതന്‍ സാബു ഫ്രാന്‍സിനെ കൂടെ കൂട്ടി ഭരണം തിരിച്ചുപിടിക്കാനുള്ള നീക്കം അണിയറയില്‍ സജീവമാക്കിയിരിക്കെയാണ് ബജറ്റ് അവതരണം പോലും അനിശ്ചിതത്തിലാക്കി അപ്രതീക്ഷിത നീക്കള്‍ക്ക് ഇന്നലെ കൗണ്‍സില്‍ സാക്ഷ്യം വഹിച്ചത്.