കക്കട്ടില്‍: സംസ്ഥാന പാതയോരത്ത് നരിപ്പറ്റ റോഡിന് സമീപത്തുള്ള തണല്‍മരത്തിനു മുകളില്‍ നൂറുകണക്കിനു വവ്വാലുകള്‍ താവളമാക്കിയത് ആരോഗ്യ പ്രശ്‌നമുണ്ടാക്കുമെന്നതിനാല്‍ മുറിച്ചു മാറ്റണമെന്ന് കുളങ്ങരത്ത് ശാഖാ മുസ്‌ലിം യൂത്ത് ലീഗ് ആവശ്യപ്പെട്ടു.
ഇതേ മരത്തിനു മുകളില്‍ നിന്നും പഴുത്തു വീഴുന്ന കായ ചാറ്റല്‍ മഴയുള്ള സമയത്ത് റോഡില്‍ വഴുക്കലുണ്ടാക്കി വാഹനങ്ങള്‍ അപകടത്തില്‍പ്പെട്ടിരുന്നു. ആളുകള്‍ തിങ്ങിപ്പാര്‍ക്കുന്ന പ്രദേശത്തുള്ള മരംമുറിച്ചു മാറ്റാന്‍ നടപടി കൈക്കൊള്ളണം.
നിപാ വൈറസ് ഭീതിയില്‍ കഴിയുന്ന നാട്ടുകാരുടെ ആശങ്ക അകറ്റാന്‍ അധികൃതര്‍ മുന്‍കൈയെടുക്കണമെന്ന് യോഗം ആവശ്യപ്പെട്ടു. ഷംസുദ്ദീന്‍ ഇല്ലത്ത്, മുബീര്‍ കോറോത്ത്, നൗഫല്‍ ചാലില്‍, ആശിഖ് കളരിക്കണ്ടി സംസാരിച്ചു.
കുറ്റ്യാടി: കാവിലുംപാറ പഞ്ചായത്തിലെ രണ്ട് മരങ്ങള്‍ വവ്വാലുകളുടെ സങ്കേതമാണെന്നതിനാല്‍ ആശങ്കയകറ്റാന്‍ നടപടി വേണമെന്ന ആവശ്യം ശക്തമാവുന്നു.
വൈറല്‍ പനിയായ നിപാ വൈറസ് വവ്വാലുകളില്‍ കൂടിയാണ് പകരുന്നതെന്ന ആരോഗ്യവകുപ്പിന്റെ സ്ഥിരീകരണത്തോടെയാണ് ജനങ്ങള്‍ ആശങ്കയിലായിരിക്കുന്നത്.
വര്‍ഷങ്ങളായി തൊട്ടില്‍പ്പാലം കെ.എസ്.ആര്‍.ടി.സി ഡിപ്പോയ്ക്കടുത്തുള്ള മരത്തിലും മൂന്നാംകൈ പാലത്തിന് സമീപമുള്ള മരത്തിലും വവ്വാലുകള്‍ താമസിക്കുന്നുണ്ട്. ഇതുവഴി നടന്നുപോകുമ്പോള്‍ വവ്വാലുകളുടെ സ്രവങ്ങളും കാഷ്ടങ്ങളും ശരീരത്തിലാകുമോ എന്ന ഭീതിയാണ് കാല്‍നടയാത്രക്കാക്കാര്‍ക്ക്.
തൊട്ടില്‍പ്പാലത്തുള്ള മരത്തില്‍ നിന്ന് ഏതാനും അകലെയായി നിറയെ മാമ്പഴമുള്ള ഒരു മാവ് സ്ഥിതി ചെയ്യുന്നുമുണ്ട്. ചെറിയ അശ്രദ്ധ വലിയ അപകടത്തിന് വഴിയൊരുക്കുമെന്നിരിക്കെ ആശങ്കയകറ്റാന്‍ അടിയന്തര നടപടി സ്വീകരിക്കണമെന്ന് നാട്ടുകാര്‍ ആവശ്യപ്പെട്ടു.