ഉരുവച്ചാല്‍: മകന്റെ പിറന്നാള്‍ ആഘോഷിക്കാന്‍ ബന്ധുക്കളെയും സുഹൃത്തുക്കളെയും ക്ഷണിച്ച് ഒരുക്കങ്ങളെല്ലാം പൂര്‍ത്തിയായി വരുന്നതിനിടെയാണ് പ്രശോഭിനെ അപകടം കവര്‍ന്നത്. ഇന്നലെ രാവിലെ പത്തു മണിയോടെ മട്ടന്നൂരിലെ നടുവോട്ടുകുന്നില്‍ വച്ചാണ് അപകടം. മകന്റെ പിറന്നാള്‍ ആഘോഷത്തിന്റെ ഭാഗമായി രാവിലെ അമ്പലത്തില്‍ പോയി വരുമ്പോള്‍ പുത്തനുടുപ്പും വാങ്ങി വീട്ടിലേക്ക് വരുമ്പോഴാണ് ബൈക്കുകള്‍ കൂട്ടിയിടിച്ച് തെറിച്ചുവീണ പ്രശോഭിന്റെ ശരീരത്തിലേക്ക് ലോറി പാഞ്ഞുകയറുകയായിരുന്നു. ഭര്‍ത്താവിന്റെ ദാരുണമരണം നിര്‍വികാരതയോടെ കണ്ടു നില്‍ക്കാനേ ഭാര്യ ശ്രുതിക്ക് കഴിഞ്ഞുള്ളു. സൈന്യത്തില്‍ ജോലി ചെയ്യുന്ന പ്രശോഭ് എപ്രില്‍ ഒന്നിന് തിരിച്ച് പോകുവാനുള്ള എല്ലാ തയാറെടുപ്പും പൂര്‍ത്തിയാക്കിരുന്നു.  പരിയാരം മെഡിക്കല്‍ കോളജില്‍ പോസ്റ്റ്‌മോര്‍ട്ടത്തിനു ശേഷം മൃതദേഹം ഇന്ന് ഉച്ചയോടെ വീട്ടിലെത്തിക്കും.