കല്ലമ്പലം: നാവായിക്കുളത്ത് ഒന്നേകാല്‍ കിലോ കഞ്ചാവുമായി യുവാവ് എക്‌സൈസിന്റെ പിടിയില്‍. കൊല്ലം വടക്കേവിള വില്ലേജില്‍ അയത്തില്‍ ചേരി നടയില്‍ പടിഞ്ഞാറ്റതില്‍ വീട്ടില്‍ ശിവകുമാര്‍ (24) ആണ് പിടിയിലായത്.
നാവായിക്കുളം ക്ഷേത്രവും, സ്‌കൂളുകളും കേന്ദ്രീകരിച്ചു കഞ്ചാവ് വില്‍പന നടക്കുന്നുണ്ടെന്ന് വിവരത്തിന്റെ അടിസ്ഥാനത്തില്‍ പ്രദേശം കുറെ ദിവസങ്ങളായി എക്‌സൈസിന്റെ നിരീക്ഷണത്തിലായിരുന്നു. കഴിഞ്ഞ ദിവസം രാത്രി ഒന്‍പതര മണിക്ക് നാവായിക്കുളം സ്‌കൂളിന് സമീപം സംശയാസ്പദമായ നിലയില്‍ കണ്ട ഇയാളെ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ കെ. അജിത്കുമാറിന്റെ നേതൃത്വത്തില്‍ ഉള്ള എക്‌സൈസ് സംഘം ചോദ്യം ചെയ്യുകയും, കൈയില്‍ ഇരുന്ന പൊതിക്കെട്ടു പരിശോധിച്ചപ്പോള്‍ കഞ്ചാവ് ആണെന്നു മനസിലാകുകയുമായിരുന്നു.
തുടര്‍ന്ന് അറസ്റ്റു ചെയ്യാന്‍ ശ്രമിക്കവേ ഇയാള്‍ അക്രമാസക്തനാകുകയും എക്‌സൈസ് ഉദ്യോഗസ്ഥരെ ആക്രമിച്ചു രക്ഷപ്പെടാനും ശ്രമിച്ചു. തുടര്‍ന്ന് സാഹസികമായാണ് ഇയാളെ കസ്റ്റഡിയിലെടുത്തത്. നാവായിക്കുളം കേന്ദ്രീകരിച്ചു കഞ്ചാവ് ചില്ലറ വില്‍പന നടത്തുന്നവര്‍ക്ക് കഞ്ചാവ് മൊത്തമായി എത്തിച്ചു കൊടുക്കുന്നയാളാണ് പ്രതിയെന്ന് സര്‍ക്കിള്‍ ഇന്‍സ്‌പെക്ടര്‍ പറഞ്ഞു. കഞ്ചാവിന്റെ ഉറവിടവും മറ്റും എക്‌സൈസ് ഓഫിസര്‍മാര്‍ അന്വേഷിച്ചു വരുന്നു .