മാന്നാര്‍ : റോഡിലെ വളവും വശങ്ങളിലെ കുഴിയും അപകടഭീതി പരത്തുന്നതായി പരാതി. സംസ്ഥാന പാത വിട്ടു മാന്നാര്‍ കുറ്റിയില്‍ ജങ്ഷനില്‍ നിന്നും ചെന്നിത്തലതട്ടാരമ്പലം ഭാഗത്തേക്കു പോകുന്ന റോഡിലെ ഷാപ്പുപടിക്കു സമീപത്തെ വളവും കുഴിയുമാണ് വാഹനയാത്രക്കാര്‍ക്കും കാല്‍ നടക്കാര്‍ക്കും വിനയാകുന്നത്. മാന്നാര്‍വിഷവര്‍ശേരിക്കര ചെന്നിത്തല തട്ടാരമ്പലം റോഡ് ഉയര്‍ന്ന നിലവാരത്തില്‍ നവീകരിച്ചു ഗതാഗതയോഗ്യമാക്കിയതോടെ ഈ പാതയില്‍ തിരക്കേറി.
കാരാഴ്മയും മാവേലിക്കരയും ഒന്നും പോകാതെ കോട്ടയം തിരുവല്ലാ ഭാഗത്തു നിന്നും ദേശീയപാതയായ കായംകുളത്തെക്കോ ഹരിപ്പാട്ടെക്കോ എളുപ്പമാര്‍ഗം എത്താന്‍ കഴിയുന്ന പാതയായതിനാല്‍ എല്ലാവരും ഈ റോഡാണ് തിരഞ്ഞെടുക്കുന്നത്. കുറ്റിയില്‍ ജംക്ഷന്‍ തിരിഞ്ഞു ആദ്യത്തെ വളവും കഴിഞ്ഞുള്ള ഭാഗത്താണ് ഏറെ അപകടസാധ്യതയുള്ള കൊടും വളവും റോഡിന്റെ തെക്കു ഭാഗത്തായി മൂന്നടിയിലിലേറെ താഴ്ചയുള്ള കുഴിയുമുള്ളത്. റോഡു നിലവാരത്തില്‍
നിര്‍മിച്ചപ്പോള്‍ ഇവിടെ വളവും കുഴിയും കാര്യമായ സുരക്ഷാസംവിധാനമൊരുക്കാത്തതാണ് അപകടങ്ങള്‍ക്കു കാരണമാകുന്നത്. ഇവിടെ തെരുവുവിളക്കും കത്താത്തത് രാത്രിയപകടങ്ങള്‍ക്കും സാധ്യതയേറെയാണ്. രണ്ടു വലിയ വാഹനങ്ങള്‍ ഒരേ സമയത്തു കടന്നു പോകുവാനും പ്രയാസകരവുമാണ്. വളവു ചേര്‍ന്നു നടന്നു പോകുന്ന യാത്രക്കാരുടെ കാര്യവും ദുര്‍ഷ്‌കരം തന്നെയാണ്. ഇതു സംബന്ധിച്ചു നാട്ടുകാര്‍ പൊതുമരാമത്തു വകുപ്പിനു പരാതി നല്‍കിയിട്ടും പരിഹാരമില്ല.