ദുബൈ: ഈദുൽ ഫിത്വർ (ചെറിയ പെരുന്നാൾ) അവധിക്കാലത്ത് യാത്ര പ്ലാൻ ചെയ്യുന്ന പ്രവാസികൾക്ക് വിമാന ടിക്കറ്റ് നിരക്കിലെ വർധന വലിയ തിരിച്ചടിയാകുന്നു. ഫെബ്രുവരിയിലെ നിരക്കിനേക്കാൾ ഇരട്ടിയോളമാണ് നിലവിൽ പലയിടങ്ങളിലേക്കുമുള്ള ടിക്കറ്റ് നിരക്ക്. കഴിഞ്ഞ വർഷത്തെ ഈദ് സമയത്തെ അപേക്ഷിച്ച് 15 മുതൽ 20 ശതമാനം വരെ വർധനവാണ് ഇത്തവണ രേഖപ്പെടുത്തിയിരിക്കുന്നത്.

മാർച്ച് 19 മുതൽ 30 വരെയുള്ള യാത്രകൾക്കാണ് ഡിമാൻഡ് കൂടുതൽ. വിനോദസഞ്ചാര കേന്ദ്രങ്ങളിലേക്കും നാട്ടിലേക്കുമുള്ള ടിക്കറ്റ് നിരക്കുകൾ കുതിച്ചുയരുകയാണ്.

സാധാരണ സമയങ്ങളിൽ ലണ്ടനിലേക്ക് 1,837 ദിർഹത്തിന് ലഭിച്ചിരുന്ന ടിക്കറ്റിനാണ് ഇപ്പോൾ 4,000-ത്തിന് മുകളിൽ നൽകേണ്ടി വരുന്നത്.

ജപ്പാനും യൂറോപ്പിനും വൻ ഡിമാൻഡ്

മാർച്ച് അവസാന വാരത്തിൽ ജപ്പാനിലെ ചെറി ബ്ലോസം (Cherry Blossom) സീസൺ ആയതിനാൽ അങ്ങോട്ടേക്ക് യാത്രക്കാരുടെ തിരക്ക് കൂടുതലാണ്. എന്നാൽ വിസ ലഭിക്കാനുള്ള കാലതാമസം യാത്രക്കാരെ കുഴക്കുന്നുണ്ട്. ജപ്പാൻ പാക്കേജുകൾക്ക് 11,000 മുതൽ 12,000 ദിർഹം വരെയാണ് നിരക്ക് ഈടാക്കുന്നത്. സ്വിറ്റ്സർലൻഡ്, പാരിസ്, നെതർലൻഡ്‌സ് തുടങ്ങിയ യൂറോപ്യൻ രാജ്യങ്ങളിലേക്കും ആവശ്യക്കാർ ഏറെയാണെന്ന് മുസാഫിർ ഡോട്ട് കോം സി.ഒ.ഒ റഹീഷ് ബാബു പറഞ്ഞു.

വിസ ഓൺ അറൈവൽ കേന്ദ്രങ്ങൾ

വിസ നടപടികൾ ലളിതമായ ജോർജിയ, ബാക്കു, അൽമാട്ടി തുടങ്ങിയ ഇടങ്ങളിലേക്ക് ഇപ്പോഴും മികച്ച ബുക്കിംഗ് നടക്കുന്നുണ്ട്. തായ്‌ലൻഡിലെ ഫുക്കറ്റ്, ക്രാബി എന്നിവിടങ്ങളിലേക്കും പ്രവാസികൾ താല്പര്യം പ്രകടിപ്പിക്കുന്നുണ്ട്.

പുതിയ ട്രെൻഡായി ക്രൂയിസ് യാത്രകൾ

ഇത്തവണത്തെ അവധിക്കാലത്ത് ക്രൂയിസ് യാത്രകളോട് ആളുകൾക്ക് താല്പര്യം കൂടിയിട്ടുണ്ടെന്ന് സ്മാർട്ട് ട്രാവൽസ് ചെയർമാൻ അഫി അഹമ്മദ് ചൂണ്ടിക്കാട്ടി. 'അരോയ' (Aroya) പോലെയുള്ള ഹലാൽ ക്രൂയിസുകൾക്ക് മികച്ച ബുക്കിംഗാണ് ലഭിക്കുന്നത്. ബിസിനസ് മേഖലയിലുള്ളവർ അഞ്ച് ദിവസത്തെ അവധി പ്രയോജനപ്പെടുത്തി നാട്ടിലേക്ക് പോകാനും പ്ലാൻ ചെയ്യുന്നുണ്ട്.

നാട്ടിലേക്കുള്ള യാത്രയും വെല്ലുവിളിയും

ഇന്ത്യയിലെ സ്കൂൾ അവധിക്കാലം കൂടി പരിഗണിച്ച് മാർച്ചിലെ അവസാന ആഴ്ച മുതൽ ഏപ്രിൽ 10 വരെ ഇന്ത്യയിൽ നിന്ന് യു.എ.ഇയിലേക്കുള്ള നിരക്കും ഉയർന്ന നിലയിലാണ്. പല കുടുംബങ്ങളും ഹ്രസ്വ വിനോദയാത്രകൾക്ക് പകരം 20 ദിവസത്തോളം നാട്ടിൽ ചെലവഴിക്കാനാണ് താല്പര്യപ്പെടുന്നത്.

അവസാന നിമിഷം ബുക്ക് ചെയ്യുന്നവർക്ക് നിരക്ക് ഇനിയും കൂടാൻ സാധ്യതയുള്ളതിനാൽ യാത്രകൾ നേരത്തെ പ്ലാൻ ചെയ്യുന്നതാണ് ഉചിതമെന്ന് ട്രാവൽ ഏജൻസികൾ നിർദ്ദേശിക്കുന്നു.

English Summary : UAE residents planning travel for the upcoming Eid Al Fitr break are encountering a significant spike in airfares. Current ticket prices have nearly doubled compared to February levels and are 15–20% higher than during the same period last year.

Popular destinations like London, which typically cost around Dh1,837 in the off-season, have jumped to over Dh4,075. Travel to Japan (Osaka) is currently priced at approximately Dh7,995.