മട്ടാഞ്ചേരി: ഗവണ്‍മെന്റ് ഗേള്‍സ് ഹയര്‍ സെക്കന്ററി സ്‌കൂളില്‍ സാമുഹിക വിരുദ്ധരുടെ ശല്യം ഏറുന്നു. രാത്രി കാലങ്ങളിലും അവധി ദിവസങ്ങളില്‍ പകല്‍ സമയത്തുമാണ് ശല്യം. സ്‌കൂളിലെ ജനറല്‍ ചില്ലുകള്‍ മിക്കവാറും തകര്‍ത്തു. ക്ലാസ് റൂമുകളുടെ താഴുകള്‍ ഓരോ തിങ്കളാഴ്ചകളിലും പുതിയത് ഇടേണ്ട അവസ്ഥയാണ്.
കുടിവെള്ള പൈപ്പുകള്‍ തകര്‍ക്കുന്നതും പതിവായിരിക്കയാണ്. രാത്രി കാലങ്ങളില്‍ സ്‌കൂളും സമീപ പ്രദേശങ്ങളും വിജനമായി കിടക്കുന്നതാണ് സാമുഹ്യ വിരുദ്ധര്‍ സ്‌കൂള്‍ താവളമാക്കി മാറ്റുവാന്‍ കാരണമായിരിക്കുന്നത്. മദ്യ കുപ്പികളും സിറിഞ്ചുകളും രാവിലെ സ്‌ക്കൂള്‍ തുറക്കുമ്പോഴുള്ള കാഴ്ചയാണ്. പ്രദേശത്ത് രാത്രി കാല പൊലിസ് പെട്രോളിങ് ആവശ്യപ്പെട്ട് പ്രിന്‍സിപ്പലും പി.ടി.എ പ്രസിഡന്റും ചേര്‍ന്ന് മട്ടാഞ്ചേരി പൊലിസില്‍ പരാതി നല്‍കിയിട്ടുണ്ട്.