ഇരിട്ടി: കര്‍ണാടകത്തില്‍നിന്ന് കാറില്‍ കടത്തുകയായിരുന്ന അഞ്ച് ചാക്ക് നിരോധിത പുകയില ഉല്‍പന്നങ്ങള്‍ ഇരിട്ടി പൊലിസ് പിടികൂടി. എന്നാല്‍ കാറിലുണ്ടായിരുന്ന പ്രതികള്‍ ഓടിരക്ഷപ്പെട്ടു. പൊലിസിനെ വെട്ടിച്ച് രക്ഷപ്പെടാന്‍ ശ്രമിച്ച സംഘത്തില്‍നിന്ന് അതിസാഹസികമായാണ് പുകയില ഉല്‍പന്നങ്ങള്‍ പിടികൂടിയത്. ഇരിട്ടി സി.ഐക്ക് ലഭിച്ച രഹസ്യവിവരത്തിന്റെ അടിസ്ഥാനത്തില്‍ നടത്തിയ പരിശോധനക്കിടെ പേരട്ട മട്ടിണി വഴി വന്ന കാറിനെ ഉളിക്കലില്‍ പൊലിസ് സംഘം കൈകാണിച്ച് നിര്‍ത്തിക്കാന്‍ ശ്രമിച്ചെങ്കിലും നിര്‍ത്താതെ പോവുകയായിരുന്നു. തുടര്‍ന്ന് ഉളിക്കല്‍ പൊലിസ് നല്‍കിയ വിവരത്തിന്റെ അടിസ്ഥാനത്തില്‍ ഇരിട്ടി എസ്.ഐ സുനില്‍കുമാറും സംഘവും ഉളിക്കല്‍ തന്തോട് കവലയില്‍ കാത്തുനില്‍ക്കുന്നതിനിടെ അതിവേഗത്തില്‍ എത്തിയ കാര്‍ ഇവരെയും വെട്ടിച്ച് തളിപ്പറമ്പ് റോഡിലേക്ക് കടന്നുകളഞ്ഞു. തുടര്‍ന്ന് പൊലിസ് സംഘം കാറിനെ പിന്തുടരുന്നതിനിടയില്‍ പടിയൂര്‍ പൂവത്ത് കാര്‍ ഉപേക്ഷിച്ച് പ്രതികള്‍ ഓടിരക്ഷപ്പെടുകയായിരുന്നു. പ്രതികളെ തിരിച്ചറിഞ്ഞിട്ടുണ്ടെന്നും എസ്.ഐ സുനില്‍കുമാര്‍ പറഞ്ഞു.